Prokuroria ndalon dy zyrtarë pasi dyshohet se punësuan kundërligjshëm disa persona

Me urdhër të Prokurorit të Shtetit janë ndaluar dy zyrtarë të lartë të Qendrës për Punë Sociale në Prishtinë,  ka bërë të ditur Prokuroria Themelore e Prishtinës, transmeton gazeta “Kosova Sot Online”.

Dy zyrtarët e ndaluar V.M dhe V.M, dyshohet se kanë kryer veprën penale  “Keqpërdorimi i pozitës apo autoritetit zyrtar”, sipas nenin 414 të KPRK-së, ngase të njëjtit dyshohen se gjatë ushtrimit të detyrave të tyre zyrtare, në mënyrë të kundërligjshme, kanë punësuar rreth 10 persona dhe kanë caktuar si menaxher për trajtim të një rasti të dhunës seksuale edhe pse personi i angazhuar s’plotësonte kushtet ligjore për trajtimin e një rasti të tillë.

“:Prokuroria Themelore në Prishtinë, njofton opinionin publik se Departamenti për Krime të Rënda, konkretisht Njësiti për Krime Ekonomike dhe Korrupsion, pas ndërmarrjes së veprimeve hetimore në koordinim të plotë më Policinë e Kosovës – Departamenti për Hetimin e Krimeve Ekonomike dhe Korrupsion në Prishtinë, ka lëshuar aktvendim mbi ndalimin e dy personave, V.M. dhe V.M., nën dyshimin se të njëjtit në cilësinë e zyrtarëve të lartë të QPS-së në Prishtinë kanë kryer veprën penale “Keqpërdorimi i pozitës apo autoritetit zyrtar”, sipas nenin 414 të KPRK-së, ngase të njëjtit dyshohen se gjatë ushtrimit të detyrave të tyre zyrtare, në mënyrë të kundërligjshme, kanë punësuar rreth 10 persona në këtë institucion, si dhe në mënyrë të kundërligjshme e kanë caktuar si menaxher për trajtimin e një rasti të dhunës seksuale, njërën nga të punësuarat përkundër faktit se e angazhuara nuk i kishte plotësuar kushtet ligjore për të trajtuar një rast të tillë dhe të ndjeshëm”, thuhet në njoftim.

Prokuroria në koordinim të plotë me Policinë është duke vazhduar me ndërmarrjen e veprimeve të mëtejshme hetimore lidhur me këtë çështje penale”, thuhet në njoftim.

(Kosova Sot Online)