Zbardhen detaje: Ish-pronari i kompanisë që fitoi tenderin për 'Rrugën A' ishte dënuar për falsifikim
Zyrtarë të shumtë të Lidhjes Demokratike të Kosovës, përfshirë kreun e saj Lumir Abdixhikun dhe kryetarin e Prishtinës, Perparim Rama, kanë reaguar pasi Gjykata Komerciale ka marrë vendim për pezullimin e punimeve të Rrugës A, transmeton gazeta “Kosova Sot Online”.
LDK po e konsideron si veprim kryekput politik pasi thonë se vendimin e ka marrë motra e deputetes Fitore Pacolli.
Megjithatë arsyeja që ka çuar deri tek ky vendim i Gjykatës Komerciale duket të jetë fakti që ish-pronari i kompanisë që ka fituar tenderin për ndërtimin e kësaj rruge ka qenë i dënuar nga Gjykata Themelore e Prishtinës për falsifikim dokumentesh.
Në vitin 2018, Gjykata Themelore e Prishtinës kishte dënuar atë botë pronarin e kompanisë N.S për falsifikim të dokumentit zyrtar, meqë personi në fjalë kishte dorëzuar një vërtetim të rrejshëm të ATK-së sa i përket obligimeve tatimore dhe se e kishte deklaruar rrejshëm numrin e punëtorëve në një aplikim për tender.
(Kosova Sot Online)