Lexoni edhe:
Në Sanxhak hapet zyra e Këshillit Kombëtar Shqiptar, fillon edhe kursi i gjuhës shqipe
Një aktakuzë e re e Hagës ngritet kundër Sheshelit dhe katër zyrtarëve të tjerë të SRS
Haga ka ngritur aktakuzë të re kundër liderit të Partisë Radikale Serbe dhe të dënuarit për krime lufte Vojislav Sheshel, si dhe katër zyrtarëve të tjerë të partisë së tij, transmeton "Kosova Sot Online".
Aktakuza është ngritur kundër liderit radikal Vojislav Sheshelj, si dhe katër zyrtarëve të tjerë të partisë – Miljan Damjanoviq, Ljiljana dhe Ognjen Mihajloviq dhe Miroljub Ignjatoviq.
Aktakuza u ngrit nga Mekanizmi Ndërkombëtar i Mbetur në Hagë, pasardhësi i Tribunalit të Hagës, shkruajnë mediat në Serbi.
“Është e vërtetë që aktakuza është ngritur. Kjo është një aktakuzë e re për shpërfillje të gjykatës”, tha Aleksandar Sheshel, djali i Vojisllav Sheshelit.
Ai shtoi se aktakuza e re u ngrit për shkak se radikalët publikuan libra dhe materiale të tjera të shtypura, si dhe materiale video dhe audio që ekspozojnë dëshmitarët e prokurorisë kundër Vojislav Sheshelj në rastin e tij kryesor.
Në prill të vitit 2018, Mekanizmi për Gjykatat Penale Ndërkombëtare, i cili pasoi Tribunalin e Hagës, e dënoi Sheshelin me dhjetë vjet burgim për nxitje të persekutimit, dëbimit dhe zhvendosjes së detyruar të kroatëve në fshatin Hërtkovci të Vojvodinës, në vitin 1992.
Ai ishte në paraburgim në Sheveningen që nga viti 2003 dhe u lirua në nëntor të vitit 2014, për shkak të përkeqësimit të shëndetit të tij.
Koha e kaluar në paraburgim iu llogarit në dënimin e tij, ndërsa ai nuk u kthye në gjykatë kur iu shqiptua dënimi.
(Kosova Sot Online )
