Osmani kërkon barazi nga BE-ja në dialog: Qasja selektive ndaj neneve të caktuara s’ndihmon

Presidentja e Kosovës, Vjosa Osmani, tha se në takimin që ka zhvilluar me emisarin amerikan, Gabriel Escobar, ka thënë se BE-ja si ndërmjetëse e dialogut Kosovë-Serbi duhet të ketë qasje parimore e të barabartë ndaj palëve, përcjell “Kosova Sot Online”.

Osmani tha se zbatimi i neneve të caktuara, duke aluduar te Asociacioni, nuk do të ndihmoj.

“Jemi thellësisht të përkushtuar. Kam potencuar gjatë këtij takimi se suksesi i këtij procesi varet edhe nga qasja parimore dhe e barabartë e ndërmjetësuesit në këtë rast të BE-së ndaj palëve dhe që është kruciale që të ketë zbatim të plotë të marrëveshjeve të dakorduara në vitin e kaluar, veçanërisht marrëveshjes bazike dhe aneksit të Ohrit. Prandaj, qasja selektive vetëm neneve të caktuara të marrëveshjes nuk do të ndihmojë sepse të gjitha nenet kanë rëndësi, prandaj edhe zbatimi duhet të jetë i plotë dhe jo i pjesshëm. Në këtë drejtim, angazhimi dhe roli i SHBA-së mbetet kyç për një përmbyllje të suksesshme të procesit të dialogut që do të çonte drejt njohjes së ndërsjellë siç është përmendur në letrën e fundit të Presidentit Biden.

(Kosova Sot Online)