Rashiti: Sulmi në Banjskë nuk ishte nga një grup i thjeshtë

Gjykimi ndaj tre të akuzuarve në rastin “Banjska” – ku mbeti i vrarë rreshteri i Policisë së Kosovës, Afrim Bunjaku, në shtator të vitit 2023 – po vazhdon sot me seancën në Gjykatën Themelore në Prishtinë, transmeton gazeta “Kosova Sot Online”.

Në këtë seancë po dëshmon zyrtari policor në Njësinë për ndërhyrje të shpejtë, Alban Rashiti, i cili ishte plagosur në aksion.

Sipas Rashitit, për përdorimin e armëve që janë përdorur duhet të ketë trajnime specifike. Ka theksuar se gjithçka ka qenë e koordinuar, pra sipas tij, ata kanë qenë një grup mirë i përgatitur dhe nuk ka qenë grup kriminal i zakonshëm.

“Kanë qenë të strukturuar shumë mirë, aty është gjuajtur edhe me raketahedhës që kërkon kompetencë, as ushtari i thjeshtë nuk di ta përdorë raketahedhësin”, ka thënë ai.

Rashiti ka thënë se ende nuk e ka filluar punën shkaku i plagëve që ka marrë atë ditë.

(Kosova Sot Online)