Zelensky: Rusia po përpiqet të shmangë mundësinë e takimit me Putin

Presidenti i Ukrainës, Volodymyr Zelensky, akuzoi të martën Rusinë se po përpiqet të shmangë çdo mundësi për një takim me presidentin Vladimir Putin, që do të synonte gjetjen e një zgjidhjeje për luftën e nisur nga pushtimi rus, transmeton gazeta “Kosova Sot Online”.

Në një reagim në rrjetet sociale, Zelensky tha se sulmet masive ajrore të Rusisë gjatë natës në disa rajone të Ukrainës janë dëshmi se Moska nuk është e interesuar për paqe.

“Aktualisht, sinjalet që po dërgon Rusia janë shumë të qarta, për të mos thënë të pahijshme. Ata po përpiqen të shmangin nevojën për të organizuar një takim,” deklaroi ai në fjalimin e tij të përnatshëm.

Sipas presidentit ukrainas, lufta ka hyrë në vitin e katërt, ndërsa pala ruse vijon të refuzojë çdo përpjekje për negociata të drejtpërdrejta në nivel të lartë, duke i qëndruar besnike rrugës së agresionit dhe përshkallëzimit ushtarak.

Zelensky ka deklaruar në mënyrë të përsëritur se është i gatshëm për një takim me Putinin, por me kushtin që Rusia të tregojë vullnet real për të ndalur agresionin dhe tërheqjen nga territori ukrainas. Deri tani, Moska nuk ka pranuar një kërkesë të tillë.

(Kosova Sot Online)