Rreth 2,000 ushtarë të Koresë së Veriut janë vrarë në Ukrainë

Rreth 2,000 ushtarë të Koresë së Veriut të dërguar për të ndihmuar Rusinë në luftën kundër Ukrainës vlerësohet se janë vrarë, tha të martën agjencia e spiunazhit të Seulit, sipas një ligjvënësi, transmeton gazeta "Kosova Sot Online".

Shërbimi Kombëtar i Inteligjencës i Seulit tha në prill se “numri i të vdekurve në luftë ishte të paktën 600”.

“Por bazuar në vlerësimet e përditësuara, tani vlerëson shifrën në rreth 2,000”, u tha ligjvënësi Lee Seong-kweun gazetarëve pas një informimi nga agjencia e spiunazhit, shkruajnë mediat e huaja.

Agjencitë e inteligjencës së Koresë së Jugut dhe Perëndimit kanë thënë se Veriu dërgoi më shumë se 10,000 ushtarë në Rusi në vitin 2024 – kryesisht në rajonin Kursk – së bashku me predha artilerie, raketa dhe sisteme raketash me rreze të gjatë veprimi.

Ligjvënësi Lee theksoi se NIS besonte se Pheniani planifikonte të vendoste 6,000 ushtarë dhe inxhinierë të tjerë në Rusi dhe se 1,000 kishin mbërritur tashmë.

“Vlerësohet se nga plani i tretë i vendosjes së fundit prej 6,000 trupash, rreth 1,000 inxhinierë luftarakë kanë mbërritur në Rusi”, tha deputeti Lee.

Koreja e Veriut konfirmoi vetëm në prill se kishte vendosur trupa për të mbështetur luftën e Rusisë në Ukrainë dhe pranoi se ushtarët e saj ishin vrarë në luftime.

Që atëherë, udhëheqësi i Koresë së Veriut, Kim Jong Un, është takuar me familjet e ushtarëve të vrarë duke luftuar për Rusinë kundër Ukrainës dhe ka shprehur ngushëllime për “dhimbjen e tyre”.

Rusia dhe Koreja e Veriut nënshkruan një marrëveshje ushtarake vitin e kaluar, duke përfshirë një klauzolë mbrojtjeje të ndërsjellë, gjatë një vizite të rrallë të presidentit rus Vladimir Putin në Korenë e Veriut.

(Kosova Sot Online)