Vuçiq ndërhyri drejtpërdrejt në zgjedhjet në BeH

Zgjedhjet e parakohshme presidenciale në Republika Srpska kanë nxitur akuza të forta nga opozita, e cila thotë se procesi zgjedhor është manipuluar në mënyrë të qëllimshme nga Milorad Dodik dhe presidenti serb Aleksandar Vuçiq, transmeton gazeta "Kosova Sot Online".

Në qendër të debatit ndodhet dyshimi për “importim të votuesve” nga Serbia, gjë që sipas opozitës ka përcaktuar fitoren e kandidatit të SNSD-së, Sinisha Karan.

Sipas rezultateve paraprake, Karan ka mposhtur kandidatin opozitar Branko Blanusha me një avantazh prej rreth 12 mijë votash. Partitë opozitare, përfshirë Partinë Demokratike Serbe (SDS), kanë refuzuar ta pranojnë rezultatin, duke e cilësuar si të manipuluar dhe duke kërkuar përsëritjen e votimit në Doboj, Laktash dhe Zvornik.

Nebojsha Vukanoviq, kreu i Listës për Drejtësi dhe Rend, akuzoi Vuciqin për ndërhyrje të drejtpërdrejtë në zgjedhje.

“Vërejtëm lëvizje të pazakontë votuesish përgjatë kufirit me Serbinë. Kandidati opozitar Blanushaa fitoi kudo, përveç në qytetet kufitare—Bratunac, Zvornik, Rudo, Vishegrad dhe Srebrenica. Nuk ka dyshim se gjithçka ishte e orkestruar nga Vuciq për të favorizuar Dodikun,” deklaroi ai.

Sipas Vukanoviqit, autobusë me mijëra votues nga Serbia kanë ardhur në Republika Srpska për të marrë pjesë në tubime dhe për të votuar sipas udhëzimeve të SNSD-së. Ai gjithashtu pretendon se Vuciq është takuar fshehurazi me Dodikun gjatë heshtjes zgjedhore dhe se mediat serbe u përdorën për të favorizuar kandidatin e SNSD-së.

Ai shtoi se votues me shtetësi të dyfishtë janë organizuar për të mbështetur Dodikun dhe se regjistrimet e shumëfishta në të njëjtat adresa tregojnë koordinim të qëllimshëm të votave në zonat kufitare. “Disa mijëra votues të importuar vendosën rezultatin në një garë që u nda me një diferencë minimale,” theksoi ai.

Opozita pretendon se kombinimi i votuesve të importuar, ndikimit mediatik dhe kontrollit administrativ tregon një përpjekje të koordinuar mes Vuciqit dhe Dodikut për të ndikuar rezultatin e zgjedhjeve në Republika Srpska.

“Kjo nuk është vetëm lëvizje votuesish—është një përpjekje sistematike për të deformuar vullnetin e popullit,” deklaroi Vukanoviq. “Serbia dhe Republika Srpska mund të kenë marrëdhënie miqësore, por kjo është ndërhyrje e hapur në një proces zgjedhor sovran.”

(Kosova Sot Online)