Zelensky refuzon anëtarësimin 'simbolik' në BE

Në samitin e parë pa Viktor Orbán, presidenti ukrainas Volodymyr Zelenskyy hodhi poshtë idenë e një anëtarësimi “simbolik” në Bashkimi Europian, duke kërkuar përshpejtim të procesit për anëtarësim të plotë.

Liderët e BE-së u mblodhën në Qipro për një samit joformal dyditor, ku miratuan një kredi prej 90 miliardë eurosh për Ukrainën dhe një paketë të re sanksionesh ndaj Rusisë. Rezultati i zgjedhjeve në Hungari hoqi veton e Budapestit, duke i hapur rrugë këtij vendimi.

Zelenskyy theksoi se Ukraina nuk ka nevojë për gjeste simbolike, por për hapa konkretë drejt anëtarësimit të plotë, duke kërkuar hapjen e kapitujve të negociatave dhe një datë të qartë fillimi.

Ndërkohë, kryeministri estonez Kristen Michal deklaroi se e ardhmja e Ukrainës është në Europë, duke theksuar se çështja është vetëm “kur”, jo “nëse”.

Samiti trajtoi edhe tensionet në Lindjen e Mesme, veçanërisht përshkallëzimin e konfliktit me Iranin dhe ndikimin në tregjet energjetike, përfshirë ngushticën e Hormuzit. Liderët diskutuan gjithashtu klauzolën e mbrojtjes së ndërsjellë të BE-së (Neni 42.7), në një kohë kur shqetësimet për sigurinë janë në rritje.

Një tjetër çështje e ndërlikuar mbetet buxheti shtatëvjeçar i BE-së, ku vendet kontribuese kërkojnë të kufizojnë shpenzimet. Synimi është arritja e një marrëveshjeje deri në fund të vitit 2026, megjithëse negociatat pritet të jenë të vështira.

(Kosova Sot Online)