Pep Guardiola zbulon planet e pensionimit

Trajneri i Manchester City, Pep Guardiola, ka thënë ka mundësi të vazhdojë ta bëjë punën e trajnerit më gjatë seç kishte planifikuar.

Në të kaluarën, Guardiola, 49 vjeç, kishte thënë se do të pensionohej herët nga futbolli për t’u marrë me interesa të tjera.

“Më herët, mendoja se do të pensionohesha së shpejti. Tani po mendoj se do të pensionohem më i vjetër. Pra, s’e di”, tha Guardiola.

Trajneri spanjoll nënshkroi kontratë të re dyvjeçare me City në nëntor dhe i ka fituar gjashtë trofe të mëdhenj me të kaltrit e Mançesterit që prej se u emërua më 2016.

Para se ta merrte drejtimin e Manchester City, Guardiola i kaloi katër vjet si trajner i Barcelonës dhe tri në krye të Bayern Munich.

“Përvoja të ndihmon, veçanërisht sesi unë e jetoj profesionin tim”, shtoi ai.

(Kosova Sot Online)