Shkëndija, kampione e Maqedonisë së Veriut
Shkëndija e Tetovës është zyrtarisht kampione e Ligës së Parë të Maqedonisë së Veriut për herë të katërt në histori.
Kuqezinjtë tetovarë, sikurse pritej, fituan 3-1 ndaj Borecit, duke ruajtur diferencën prej 13 pikësh ndaj Shkupit të vendit të dytë, e pamundur për t’u ngushtuar në katër javët e mbetura, pasi në lojë janë vetëm 12 pikë.
Skuadra e Ernest Gjokës nuk u paraqit në nivelin e duhur gjatë pjesës së parë, që e mbylli në disavantazh të një goli, të shënuar nga Bjetullai në portën e tij. Gjithsesi, në fraksionin e dytë Shkëndija tregoi vlerat e saj të vërteta, duke e ndëshkuar tri herë kundërshtarin me Besart Ibraimin, Rubin Hebajn dhe Mevlan Muratin.
Një triumf përfundimtar më se i merituar për kuqezinjtë, pavarësisht një nisjeje me luhatje të kampionatit.
Një fitore të madhe dhe me përmbysje 2-3 arriti Struga Trim&Lum në fushën e Makedonija GP, Shkupi iu imponua 2-0 Rabotnickit, Vardari fitoi 1-0 me Belasican dhe Pelister – Renova u mbyll 1-0.
(Kosova Sot Online)