Kazakistani anulon miqësoren me Kosovën, nuk e njeh si shtet

Kombëtarja e Kosovës në futboll ka njoftuar se ka ndërruar dy nga katër rivalët për ndeshjet miqësore të qershorit.

Kosova kishte planifikuar të luante ndeshje miqësore me Kazakistanin në “Fadil Vokrri” më 4 qershor, por kombëtarja nuk është lejuar të udhëtojë nga qeveria e Kazakistanit.

Kazakistani nuk e njeh pavarësinë e Kosovës dhe kjo është arsyeja që qeveria nuk e ka lejuar ekipin të udhëtojë në Kosovë.

Edhe pse tash e pesë vite jemi të pranuar në FIFA dhe UEFA me të drejta të plota, politika vazhdon të ndikojë.

I kontaktuar nga Gazeta Express, sekretari gjeneral i Federatës së Futbollit të Kosovës, Eroll Salihu tha se me Federatën e Futbollit të Kazakistanit kanë raporte shumë të mira.

“Besoj që po”, theksoi Salihu kur u pyet nëse anulimi i ndeshjes ka ndodhur për shkak që Kazakistani nuk e njeh Kosovën.

“Si Federata kemi raporte shumë të mira” – tha  Eroll Salihu.

Në vend të Kazakistanit, në atë datë Kosova do të luajë ndeshje miqësore me Maltën në Austri.

Ndërkohë, miqësorja tjetër e paraparë për t’u zhvilluar në Antalia më 8 qershor kundër Komorosit, do të zëvendësohet me Guinenë, pasi Komorosi për shkak të restrikcioneve për hyrje në Turqi si pasojë e Covid-19, e ka të pamundur të udhëtojë në këtë datë në Antalia.

(Kosova Sot Online)