Lexoni edhe:
Ky është pronari i furrës në Fushë Kosovë që dyshohet se sulmoi seksualisht punëtoren
Vojvoda e ka “blinduar” krahun e majtë të Torinos
Torino është mjaft e kënaqur me kontributin që e dha Mërgim Vojvoda në sezonin 2021/22.
Mbrojtësi kosovar shkëlqeu në pozitën e krahut të majtë duke i dhënë siguri trajnerit Ivan Juric.
Për këtë arsye, klubi “Granata” po llogarit në përfaqësuesin kosovar edhe për sezonin e ardhshëm.
Madje, ai është njëri prej lojtarëve më të rëndësishëm dhe më të paprekshëm të ekipit torinez.
Sipas mediave italiane, Vojvoda është adaptuar mjaft mirë në sistemin e Torinos dhe trajneri kroat Juric ka fjalë të mëdha për futbollistin.
Vojvoda ka qenë gjithmonë në dispozicion sa herë që ekipi kishte nevojë për të, duke sakrifikuar dhe duke luajtur në krahun e majtë, edhe pse i djathti është natyral për të.
Me largimin e Ansaldit, shkruan mediumi ToroNews”, Vojvoda do të ketë edhe më shumë hapësira në krahun e majtë. Por, ndërkohë Torino do ta marrë edhe një mbrojtës të majtë për t’i bërë konkurrencë 27 vjeçarit nga Skenderaj.
Vojvoda e posedon kualitetin e mjaftueshëm për të luajtur në Torino, ndërsa trajneri Juric beson fuqishëm se lojtari do të përmirësohet edhe më shumë në sezonin 2022/23.
(Kosova Sot Online )
