Ja kush refuzon Liverpoolin
Liverpool ka pësuar një goditje të rëndë në merkaton e verës, pasi objektivi kryesor i klubit, Yan Diomande, raportohet se ka vendosur ta vazhdojë karrierën te Paris Saint-Germain nëse largohet nga RB Leipzig.
Diomande zgjedh Parisin
19-vjeçari nga Bregu i Fildishtë ishte një nga prioritetet kryesore të Liverpoolit për repartin ofensiv. “The Reds” kishin paraqitur një ofertë prej 100 milionë eurosh, e cila u refuzua nga RB Leipzig, ndërsa po përgatiteshin të riktheheshin me një propozim të ri.
Megjithatë, sipas gazetarit David Ornstein, Diomande tashmë ka vendosur se destinacioni i tij i preferuar është PSG. Sulmuesi është bindur nga projekti i presidentit Nasser Al-Khelaifi, këshilltarit sportiv Luis Campos dhe trajnerit Luis Enrique, me të cilin dëshiron të punojë.
Raportohet se talenti afrikan beson se në Paris do të ketë më shumë mundësi të fitojë trofe të mëdhenj dhe të luftojë në të ardhmen edhe për “Topin e Artë”.
Liverpool nuk dorëzohet ende
Pavarësisht këtyre raportimeve, gazetari Ben Jacobs bën të ditur se Liverpool nuk ka marrë ende një refuzim zyrtar nga lojtari apo përfaqësuesit e tij. Klubi anglez vazhdon të besojë se ka bërë përparim në negociatat me kampin e futbollistit.
Megjithatë, burime pranë Diomandes kanë konfirmuar se dëshira e tij është të luajë nën drejtimin e Luis Enriques, çka e bën PSG-në favorit absolut për transferimin.
Barcola dhe emra të tjerë në listë
Në rast se Diomande përfundon në Paris, Liverpool pritet të orientohet drejt alternativave të tjera. Emri që kryeson listën është Bradley Barcola, i cili së fundmi është lidhur me një largim të mundshëm nga PSG.
Megjithëse kampionët e Francës nuk kanë shfaqur gatishmëri për ta shitur francezin, ardhja e mundshme e Diomandes mund të ndryshojë situatën. Për Barcolan interesim ka shfaqur edhe Arsenali.
Në listën e alternativave të Liverpoolit përfshihen gjithashtu Said El Mala i FC Köln, Matias Fernandez-Pardo i Lille dhe Yankuba Minteh i Brighton, ndërsa mbetet për t’u parë se cili prej tyre do të bëhet objektivi kryesor i klubit anglez në javët e ardhshme.
(Kosova Sot Online)
