Munishi: Jam shtylla më e fortë e futbollit
Derbi kryesor i javës, Llapi-Prishtina, i takoi kryeqytasve që fituan 2:0 në stadiumin “Zahir Pajaziti”.
Në minutën e 41-të, Prapashtica shënoi për ta kaluar Prishtinën në epërsi.
Krejt në sekondat e fundit të ndeshjes, Endrit Krasniqi shfrytëzoi gabimin e portierit të Llapit, Ilir Avdylit dhe dyfishoi epërsinë, çka doli të ishte epilogu i këtij takimi në fund.
Pas ndeshjes, trajneri i Prishtinës, Ismet Munishi nuk i kurseu as lëvdatat për veten.
“Fituam ndaj një ekipi shumë të mirë. Ia kemi shkaktuar humbjen e parë Llapit, që vinte pas një serie të mirë. Është dashur shumë energji për lojtarët, trajnerin, stafin dhe logjistikën e klubit për ta kthyer besimin. Unë jam trajneri më i mirë në Kosovë. Për çdo gjë mund të më sulmojnë. Por, unë dhe futbollistët e mi jemi shtylla më e fortë e ekipit, ndërsa unë jam shtylla më e fortë e futbollit të Kosovës. Te ne duhet të ngritët vetëdija”, u shpreh Munishi.
(Kosova Sot Online)