“S’do ta harroj kurrë momentin kur e ndiqja live”, Dua Lipa uron kështu Pavarësinë e Kosovës

  • G.G /
  • 17 shkurt 2021 - 10:12
“S’do ta harroj kurrë momentin kur e ndiqja live”, Dua Lipa uron kështu Pavarësinë e Kosovës

Sot Kosova mbush plot 13 vite shtet dhe 17 shkurti është një datë e shënuar për të gjithë shqiptarët.

Me siguri e mbani mend momentin e bukur të shkurtit të vitit 2008, kur Kosova u shpall shtet i lirë dhe fitoi pavarësinë, duke çuar peshë zemrat e shqiptarëve.

Në 13 vite, Kosova është zhvilluar dhe ka ndryshuar goxha shumë, teksa jeton ditët e saj më të bukura të lirisë.

Personazhe të njohur të showbiz-it kanë uruar në rrjete sociale për Pavarësinë e Kosovës dhe si mund të mungonte një super urim nga Dua Lipa? Këngëtarja shqiptare ka ndarë në llogarinë e saj në Instagram një foto të sajën të animuar, me flamurin e Kosovës në sfond.

Krahas postimit, Dua tregon se ende i vijnë në kujtesë emocionet e bukura të momentit të shpalljes së Pavarësisë, të cilën e ndiqte live në ekran.

Asokohe, Dua jetonte në Prishtinë dhe megjithëse është larguar, nuk e ka harruar kurrë vendin e saj. Këngëtarja tregon se është krenare për Kosovën dhe arritjet e saj.

“Gëzuar ditën e Pavarësisë Kosovë! 13 vite! S’do ta harroj kurrë momentin kur e ndiqja live në TV, teksa jetoja në Prishtinë. Emocione, emocione, emocione, energjia e qytetit! E paharrueshme! Krenare të shoh deri ku ke arritur dhe sa shumë do të arrish!”- janë fjalët e saj.

https://www.instagram.com/p/CLYsZcZMxLH/?utm_source=ig_web_copy_link

(Kosova Sot Online)