Aktori i njohur, Yaphet Kotto ndërron jetë në moshën 81-vjeçare

Aktori amerikan, Yaphet Kotto, ka ndërruar jetë në moshën 81-vjeçare. Ai u bë i njohur për publikun për performancën e tij në filmin “Alien” dhe portretizimin e personazhit, Mr. Big, në filmin e vitit 1973 me agjentin James Bond, “Live and Let Die”.

Lajmin e vdekjes së aktorit e konfirmoi bashkëshortja përmes një mesazhi prekës në rrjetin social Facebook.

“Jam e pikëlluar dhe ende e shokuar me vdekjen e bashkëshortit tim prej 24 vjetësh. Yaphet ti në shumë filma i ke portretizuar personazhet e liga por për mua dhe shumë njerëz që të njohën personalisht, je një hero i vërtetë. Një burrë, baba dhe bashkëshort i mirë si dhe një njeri i drejtë dhe i denjë. Ishe një prej aktorëve më të mirë në Hollywood, dhe një legjendë e vërtetë mirë. Pusho në paqe i dashur. Do të më mungosh çdo ditë, miku im i jetës”.

Ndërkohë ende nuk është zbuluar shkaktari i vdekjes së aktorit.

Yaphet Kotto gjatë karrierës së tij filmike kishte luajtur në disa filma të njohur, si horrori fantastiko-shkencor i regjisorit Ridley Scott, “Alien”, si dhe ka luajtur krahas yllit Arnold Schwarzenegger në filmin e vitit 1987, “The Running Man”. Ai gjithashtu e portretizoi lejtënantin Al Giardello në serialin “Homicide: Life on the Street”.

(Kosova Sot Online)