Lexoni edhe:
E trishtë: Edhe babai i Shpat Kasapit ndërroi jetë në të njëjtën moshë
Osmani nderon artisten Adelina Ismaili me 'Mirënjohjen Presidenciale' me rastin e 40-vjetorit të karrierës
Mbrëmja gala e organizuar për të shënuar 40-vjetorin e karrierës së artistes Adelina Ismaili, u hap me një nga momentet më të fuqishme emocionale, shkruan gazeta "Kosova Sot Online".
Para se dritat e skenës të ndizeshin për recitalin e shumëpritur, artistja u surprizua me një vlerësim të veçantë nga institucioni më i lartë i vendit.
Presidentja e Kosovës, Vjosa Osmani, i dorëzoi këngëtares ikonë Mirënjohjen Presidenciale, si shenjë respekti dhe falënderimi për kontributin e saj të jashtëzakonshëm në muzikën shqiptare ndër vite.
Me një fjalim plot ndjeshmëri dhe vlerësim, Presidentja Osmani theksoi se Adelina, e njohur si diva e muzikës moderne shqiptare, është jo vetëm një forcë krijuese në skenë, por edhe një frymëzim i gjeneratave dhe një zë i rëndësishëm artistik e shoqëror.
Ky moment solemn erdhi në kuadër të jubileut madhështor të artistes, e cila prej katër dekadash mbetet një simbol i identitetit kulturor dhe emocioneve muzikore shqiptare. Në prag të këtij përvjetori, Adelina ka publikuar edhe mini-albumin e saj më të ri, të titulluar “Grua”, një projekt që ka ngjallur entuziazëm të gjerë dhe është pritur me admirimin e fansave.
Mbrëmja recital solli një performancë të paharrueshme, duke rikthyer para publikut meloditë, emocionet dhe momentet kulmore që kanë shënuar rrugëtimin 40-vjeçar të artistes që ka lënë gjurmë të pashlyeshme në skenën shqiptare.
Me artin e saj të guximshëm dhe personalitetin e saj të pakompromis, Adelina Ismaili vazhdon të mbetet një prej ikonave më të dashura dhe më me ndikim të kulturës sonë.
(Kosova Sot Online)
