MSH-ja pagoi 250 mijë euro për spitalet private për shërbimet që nuk i kryen
Raporti i Auditorit për Ministrinë e Shëndetësisë
Auditori e vlerëson si rrezik mungesën e një politike të qëndrueshme për arsyetimin e shpenzimeve
"Shqyrtimi me vonesë i kërkesave mund të ndikojë që pacientët të mos e marrin trajtimin me kohë", thuhet në raportin e Auditorit të përgjithshëm
Pacientët kosovarë, përveçse ballafaqohen me mungesë të barnave për trajtim në institucionet shëndetësore, ata në të njëjtën kohë me shumë vështirësi mund të gjejnë përkrahjen e Ministrisë së Shëndetësisë për mbështetje financiare për trajtim në institucionet private në Kosovë dhe jashtë saj. Arsyetimi gjithmonë është në mungesë të mjeteve financiare. Por, pavarësisht kësaj, Ministria e Shëndetësisë, që udhëhiqet nga ministri Imet Rrahmani, vitin që lëmë pas ka paguar hiç më pak se 250 mijë euro spitaleve private në Kosovë dhe jashtë saj për shërbimet që ato nuk kanë kryer asnjëherë për pacientët kosovarë, shkruan Orainfo. Kjo është një nga e të gjeturat e Auditorit të Përgjithshëm në raportin që u publikua dje për Ministrinë e Shëndetësisë."Trajtimi i pacientëve të subvencionuar nga MSHja bëhet në rreth 100 Institucione Private Shëndetësore (IPSH) brenda dhe jashtë Kosovës. Në vitin 2015 MSH-ja ka bërë 5 barazime financiare me institucionet private për subvencionet e dhëna gjatë vitit 2014, ndërsa me një institucion privat barazimi ishte bërë për tërë pacientët e trajtuar gjatë viteve. Nga këto barazime kanë rezultuar rreth 250,000 euro të pashfrytëzuara. Do të thotë që mjetet janë paguar, por nuk janë marrë shërbimet nga pacientët. Pas këtyre barazimeve këto mjete janë ridestinuar/shfrytëzuar për trajtimin e pacientëve tjerë", thuhet në raportin e auditorit, shkruan gazeta "Kosova Sot".
Menaxhimi i subvencioneve vazhdon të ketë dobësi
Përmes testimeve auditori ka vërejtur se menaxhimi i subvencioneve vazhdon të ketë dobësi. Auditori e vlerëson si rrezik mungesën e një politike të qëndrueshme për arsyetimin e shpenzimeve për TMJIPSH dhe shqyrtimi i kërkesave në kundërshtim me rregullat në fuqi ndikon në menaxhimin joefektiv të subvencioneve, duke krijuar pagesa potencialisht të parregullta, dhe rrezikon që pacientët jomeritorë të përfitojnë. "Shqyrtimi me vonesë i kërkesave mund të ndikojë që pacientët të mos marrin trajtimin me kohë. Derisa mosbarazimet me institucionet shëndetësore kanë bërë që mjetet e paguara të mbeten të pashfrytëzuara, përderisa në kohën e njëjtë shumë pacientë në nevojë kanë mbetur pa përfituar, me arsyetimin e mungesës së mjeteve", thuhet në raport.
Marrëdhëniet me institucionet shëndetësore private
Auditori rekomandon ministrin se duhet të sigurohet që subvencionet të paguhen pas nënshkrimit të një marrëveshje formale në mes të MSH-së dhe përfituesit, ku qartësohen obligimet e të dy palëve."Gjatë zhvillimit të procedurave të aplikimit dhe shqyrtimit të tyre duhet të respektohen kërkesat ligjore. Përveç kësaj Ministri duhet të iniciojë krijimin e një rregullore/udhëzimi për të përcaktuar përgjegjësitë e MSH-së dhe marrëdhëniet me institucionet shëndetësore private, duke specifikuar në mënyrë të qartë kërkesat për raportim financiar dhe në lidhje me shërbimet e ofruara", rekomandon auditori.
(Kosova Sot)
