Dënohet kosovari që vodhi në kishë

Gjykata e Gjakovës ka shpallur aktgjykimin në rastin e Ismet Lokajt, i akuzuar për vjedhje të rëndë.

Në këtë shqyrtim nuk ishte e pranishme e dëmtuara – motra e nderit Hana Spaqi. Sipas aktgjykimit të gjyqtarit Mentor Bajraktari, i akuzuari u shpall fajtor dhe u dënuar me burg në kohëzgjatje prej 2 vjet e 8 muaj.

Në këtë dënim është llogaritur koha e kaluar në paraburgim. Po ashtu, i akuzuari u obligua me shpenzimet procedurale. Para se të dënohej, pas leximit të aktakuzës nga prokurori Ramiz Buzhala, i akuzuari Ismet Lokaj pranoi fajësinë.

“E pranoj fajësinë për veprën penale për të cilën akuzohem sepse jam penduar shumë për këtë veprim dhe sot po e shoh që motra e nderit zonja Spaqi nuk është këtu, ngase kam dashur që t’i kërkoj falje publikisht dhe për rastin e ndodhur t’ia kthej shumën e parave të marra”, deklaroi i akuzuari Ismet Lokaj.

Prokurori Buzhala lidhur me pranimin e fajësisë deklaroi se nuk e kundërshton këtë pranim nga ana e te akuzuarit, pasi që, sipas tij, i njëjti i ka kuptuar veprimet e bëra dhe me vullnet të plotë e ka bërë këtë pranim, i cili mbështetet në fakte dhe prova të aktakuzës.

Avokati i të akuzuarit, Driton Dobruna, i caktuar sipas detyrës zyrtare, deklaroi se gjendja e psiko-fizike e klientit të tij është përmirësuar që nga arrestimi. “Atëherë konsideroj se i njëjti me vetëdije të plotë e ka bërë këtë pranim dhe si të tillë Gjykata ta merr si rrethanë lehtësuese bashkë me keqardhjen e tij të shprehur gjatë marrjes në pyetje në prokurori në prezencën e të dëmtuarës”, tha avokati Dobruna.

Gjyqtari Mentor Bajraktari me aktvendim e miratoi pranimin e fajësisë nga i akuzuari pastaj shpalli atë fajtor dhe i shqiptoi dënimin.

I akuzuari gjendet në paraburgim nga data 13 prill 2018.

Sipas aktakuzës, i akuzuari Ismet Lokaj me datën 3 prill të këtij viti, në fshatin Novosellë të Epërme të Gjakovës, në kishën e fshatit, në shtëpinë e motrave të nderit, me qëllim të përvetësimit të kundërligjshëm ia merr pasurinë e paluajtshme të dëmtuarës Hana Spaqi, në atë mënyrë që i dëmtuari shfrytëzon momentin dhe shkon në katin e dytë ku është dhoma e të dëmtuarës dhe merr një telefon të markës Iphone ngjyrë hiri, një orë dore, ndërsa nën krevat merr portofolin në të cilën kishte 10.000 euro, 2.000 franga zvicerane dhe 400 dollarë amerikanë, e më pas me automjet largohet në drejtim të panjohur.

Me këto veprime i akuzuari kishte kryer veprën penale të vjedhjes së rëndë.

 

(Kosova Sot)