Serbi njofton shqiptarin, se kush ia vrau babanë: I njëjti kriminel që likuidoi vëllezërit Bytyçi
Në fillim të korrikut, Lulëzim Morinës nga Prizreni, në postën e shtëpisë së tij në Zvicër, i kishin shkuar dy fotografi, në të cilat figuronte varri i babait të tij.
Pak para se t’i pranonte fotot, Lulëzimi tregon se dikush i kishte telefonuar dhe në gjuhën serbe i kishte treguar se kush ia ka vrarë të atin dhe ku është varrosur trupi i tij.
Babai i tij, Sali Morina, bashkë me Miftar Morinën, më 23 mars të vitit 1999 ishin kapur nga Policia serbe dhe prej asaj kohe konsiderohen të zhdukur.
Bazuar në fotografitë që në postë i shkuan nga një anonim, ai filloi kërkimin e eshtrave të babait në varrezat e myslimanëve në Prizren.
Ai ka treguar se si i kanë gjetur këto varre, mirëpo, jo edhe eshtrat e babait të tij.
Si pjesëtar i familjeve të të zhdukurve, shpreh mllefin se përse aq pak u punua për zbardhjen e fatit të të afërmve të tyre, transmeton Koha.net.
Njëri prej varreve të cilin e gjeti Lulëzimi, ishte hapur edhe në kohën e UNMIK-ut. Por, sipas drejtorit të Departamentit të Mjekësisë Ligjore, Arsim Gërxhaliu, në këtë lokacion janë gjetur edhe eshtrat e mbi 200 personave të tjerë, transmeton Telegrafi.
Ndërkaq, i apostrofuari Goran Radisavleviq, i njohur si komandant “Guri”, dyshohet edhe për vrasjen e vëllezërve Bytyçi.