Eskalojnë tensionet, Armenia thotë se Turqia i ka dërguar 4,000 luftëtarë në Azerbajxhan

  • E.K /
  • 28 shtator 2020 - 11:35
Eskalojnë tensionet, Armenia thotë se Turqia i ka dërguar 4,000 luftëtarë në Azerbajxhan

Ambasadori i Armenisë në Rusi tha të hënën se Turqia i ka dërguar rreth 4,000 luftëtarë nga pjesa veriore e Sirisë në Azerbajxhan.

Sipas këtij diplomati, këta luftëtarë tashmë janë duke marrë pjesë në luftime përgjatë vijës së frontit në rajonin e kontestuar të Nagorno-Karabakut, raportoi agjencia Interfax.

Megjithatë, një ndihmës i presidentit azer, Ilham Aliyev, e mohoi një gjë të tillë, duke e cilësuar deklaratën e ambasadorit armen si provokim të radhës nga Armenia.

“Thashethemet se militantët nga Siria po dërgohen në Azerbajxhan janë një tjetër provokim nga ana armene dhe s’kanë kurrfarë kuptimi”, tha ndihmësi i presidentit Aliyev, Khikmet Gadzhiev.

Luftimet me Azerbajxhanit me shumicë myslimane dhe Armenisë me shumicë të krishterë paraqet rrezik për përfshirjen e fuqive rajonale si Turqia dhe Rusia.

Kryeministri armen, Nikol Pashinyan, të dielën u bëri thirrje fuqive botërore që ta parandalojnë ndërhyrjen e Turqisë në konflikt pasi kjo e fundit disa here e ka kërcënuar Armeninë dhe ka thënë se do t’i ofrojë përkrahje në çdo formë Azerbajxhanit.

Kombet e Bashkuara, Shtetet e Bashkuara, Franca, Rusia dhe Kina kanë bërë thirrje për armëpushim të menjëhershëm në zonën e konfliktit.

(Kosova Sot Online)