Rrahën shqelma policët në Fushë Kosovë, Gjykata merr vendimin për të dyshuarit

  • E.K /
  • 05 November 2020 - 17:41
 Rrahën shqelma policët në Fushë Kosovë, Gjykata merr vendimin për të dyshuarit

Gjykata Themelore në Prishtinë ka caktuar masën e paraburgimit ndaj të dyshuarve për sulmin ndaj zyrtarëve policorë në Fushë Kosovë.

Në njoftimin e Gjykatës bëhet e ditur se të pandehurit F.K., G.K., B.K dhe Sh.K dyshohen për veprën penale “Vrasje e rëndë në tentativë”.

‘Të pandehurve F.K, G.K, B.K gjykata iu ka caktuar masën e paraburgimit në kohëzgjatje prej 1 (një) muaji për secilin veç e veç, duke filluar prej datës 03.11.2020 deri me datë 02.12.2020, ndërsa për të pandehurin SH.K është refuzuar kërkesa për caktim të paraburgimit dhe është liruar që i njëjti të mbrohet në liri. Kërkesa për caktim të paraburgimit, pasi që nga provat nuk është vërtetuar se i njëjti ka kryer veprën penale për të cilën është dyshuar”, thuhet në njoftimin e Gjykatës.

“Të pandehurve F.G, G.K dhe B.K, iu është caktuar masa e paraburgimit, pasi që të njëjtit mund të arratiset me qëllim të shmangies nga përgjegjësia penale dhe në këtë mënyrë do të jenë të paarritshëm për organet e drejtësisë, mund të pengojnë rrjedhën e procedurës penale duke ndikuar në dëshmitar dhe bashkëpjesëmarrës tjerë, andaj caktimi i masës së paraburgimit për të pandehurit është masë adekuate për sigurimin e pranisë së tyre në procedurë penale”, thuhet në njoftim.

Incidenti ka ndodhur mesditën e së martës në Fushë Kosovë, ndërmjet Policisë dhe disa qytetarëve. Derisa Policia ka ndalur qytetarët, këta të fundit kanë sulmuar zyrtarët policorë.

Si pasojë e përleshjes fizike, policia ka shtënë me armë zjarri në drejtim të qytetarëve të përfshirë në këtë rast, ku njëri ka mbetur i plagosur.

“Të pandehurit F.G, G.K dhe B.K, dyshohen se me datë 03.11.2020 rreth orës 15:40 deri sa të dëmtuarit N.G dhe E.R të cilët janë zyrtar policor ishin në kryerjen e detyrave zyrtare, në rrugën “Rruga e Pejës” në Fushë Kosovë, afër rrethit gjegjësisht Qebaptores “Graniti” kanë vërejtur parking të parregullt të një veturës dhe të cilit i kishin shqiptuar një tiketë trafiku dhe i kishin kërkuar të largohet dhe tani zyrtarët policor ishin nisur në drejtim të veturës zyrtare, ku me atë rast të pandehurit F.K, B.K, A.K, G.K, SH.K që janë pronar të Qebaptores “Graniti” kishin dal para lokalit dhe të gjithë në bashkëkryerje kishin filluar fillimisht ti fyejnë dhe ti kërcënojnë e më pas me mjete të forta me qëllim të privimit nga jeta, kishin filluar që ti godasin zyrtarët policor duke tentuar që të ju marrin armën dhe pajisjet tjera zyrtare dhe pastaj i kishin goditur në regjionin e kokës dhe në tërë trupin, duke ju shkaktuar lëndime trupore”, ka njoftuar Gjykata.

(Kosova Sot Online)