Këshilli Komunal për Siguri: Ka rënie të veprave penale në Malishevë, gjendja stabile

  • E.K /
  • 03 December 2020 - 11:49
Këshilli Komunal për Siguri: Ka rënie të veprave penale në Malishevë, gjendja stabile

Këshilli Komunal për Siguri në Bashkësi (KKSB) në Malishevë, nën drejtimin e nënkryetarit të komunës, Hajdin Berisha, sot e ka mbajtur mbledhjen e rregullt, ku është vlerësuar situata e sigurisë së përgjithshme, ku u tha se situata është e qetë, stabile dhe pa tendecë të destabilizimit të kësaj situate.

Komandanti i stacionit policor në Malishevë, kapiteni Azem Krasniqi, ka thënë siguria e përgjithshme në Komunën e Malishevës është e mirë, stabile dhe pa tendecë të destabilizimit të kësaj situate.

“Ka rënie të veprave penale, e po ashtu edhe pse jemi në një situatë të rëndë pandemike, nuk ka probleme dhe krejt falë vetëdijes së lartë të qytetarëve të Komunës së Malishevës dhe mirëkuptimit të treguar gjatë pandemisë e sidomos gjatë karantinës”, shtoi ai.

Sa përket situatës pandemike në Komunën e Malishevës, nënkryetari Hajdin Berisha, në raportimin e tij, tha se situata me Covid-19 është nën kontroll të plotë.

“Edhe pse në fillim të pandemisë kemi qenë komuna më e prekur, por falë qenësisë, punës së pandërprerë, kjo situatë është qetësuar dhe tani jemi në mesin e komunave më të mira me gjendjen me covid-19”, tha ai.

Po ashtu në këtë takim, edhe drejtori për Mbrojtje dhe Shpëtim, Hafir Rexha, ka raportuar për përgatitjet për sezonin e dimrit, ku sipas tij, janë kryer të gjitha procedurat dhe janë të gjitha përgatitjet për sezonin dimëror, e po ashtu komuna është përgatitur edhe kujdesin në raport me rastet sociale gjatë këtij dimri, ku të gjitha familjet me gjendje jo të mirë ekonomike, do të përkrahen.

(Kosova Sot Online)