Vjen reagimi i ashpër i Meliza Haradinaj-Stublla: Skema kriminale funksionoi për ta tjetërsuar rezultatin që u certifikua sot

  • E.K /
  • 13 mars 2021 - 12:20
Vjen reagimi i ashpër i Meliza Haradinaj-Stublla: Skema kriminale funksionoi për ta tjetërsuar rezultatin që u certifikua sot

Kandidatja për deputete nga Aleanca për Ardhmërinë e Kosovës, Meliza Haradinaj-Stublla, ka reaguar pasi nuk ka arritur të futet si deputete në legjislaturën e re të Kuvendit të Kosovës.

Haradinaj-Stublla me anë të një postimi në rrjetin social Facebook ka shkruar se ndaj saj është vendosur një skemë e cila thotë se e funksionoi për t’ia tjetërsuar rezultatin që u certifikua sot.

“Skema kriminale funksionoi për të më njollosur rrënjësisht mua dhe familjen time, dhe për të tjetërsuar rezultatin që u certifikua sot sipas planit duke varrosur të vërtetën e vullnetit qytetar!”, ka shkruar Haradinaj-Stublla.

Postimi i plotë i saj:

SKEMA KRIMINALE FUNKSIONOI…

… për të më njollosur rrënjësisht mua dhe familjen time, dhe për të tjetërsuar rezultatin që u certifikua sot sipas planit duke varrosur të vërtetën e vullnetit qytetar!

Incizimi i inskenuar e i sponzorizuar, që u publikua ditë më parë, që u interpretua nga pseudo-portalet sipas dëshirës së porositësve, se kinse bashkëshorti im implikohet në bisedat e ulëta që zhvilloheshin në atë video 30 minutëshe, përmban tregues të mjaftueshëm e të bindshëm për inskenimin e dobët teatral që bëri banda kriminale sponzorizuese e kësaj fushate denigruese KUNDËR MEJE.

Por, t’i kthehemi substancës:
Tani që u raportua se dy veglat e krimit të videos kanë dalë para drejtësisë, skenari dhe porositësit e tij besoj fuqishëm se përfundimisht do të zbardhen me zbulimin e identitetit të protagonistit të tretë X1 (dhe mendoj kryesor) të video-inskenimit. I bëj thirrje publike Kryeprokurorit të Prishtinës Kujtim Munishi, i cili apostrofohet nga personi i tretë në këtë video publike në minutin 25:10, që të deklarohet se nëse ekziston lidhja e tij me këtë person, nëse e ka takuar siç po pretendohet në video, dhe kush është ai. Personi i tretë zbardhë gjithçka… madje edhe porositësin ‘politik’ që ka udhëzuar inskenimin e kësaj videoje, dhe ka kurdisur votat në QNR!
Faktet janë kokëforta, dhe e vërteta është brutale.
Në pritje të saj…

(Kosova Sot Online)