Ish-përkthyesi: U kam shërbyer britanikëve, familja ime rrezikon të vritet nga talebanët
Korrespodenti i BBC ka intervistuar një përkthyes afgan, që ka punuar për forcat britanike gjatë luftimeve në Afganistan. Ali (emri i të cilit është ndryshuar për arsye sigurie) u largua disa vite më parë nga Afganistani, pasi u kërcënua nga talebanët. Familja e tij është fshehur.
Qeveria britanike i ka dhënë Aliut leje për t’u vendosur në Mbretërinë e Bashkuar, por viza nuk u është dhënë prindërve, vëllezërve e motrave të tij.
Me dëshpërim ai kërkon, që ata të evakuohen dhe ka frikë se do të vriten.
“Një natë një i huaj në rrugë më thirri emrin. Ai ishte taleban dhe tha se e dinte që unë punoja për britanikët. Ishte shumë tronditëse për mua. Ata dinin gjithçka për mua. Ai tha,” Ti e di se çfarë do të ndodh ty’. Pas kësaj, unë ika dhe u bëra refugjat në një vend aty pranë. Nuk kam parë nënën, babanë ose vëllezërit e mi për vite me radhë. Kam shitur florinjtë e familjes sime për të mbijetuar.
Tani që talibanët kanë marrë pushtetin, të afërmit e mi janë fshehur për shkak të kërcënimeve ndaj familjes sonë. Tani më është dhënë leja për t’u vendosur në Mbretërinë e Bashkuar, por çfarë do të ndodh me familjen time?
Po dëgjoja kryeministrin britanik, Boris Johnson, në parlament të mërkurën, ai tha se Britania po u jep 20,000 viza afganëve. Kujt po i jepen vizat? Kam shërbyer me forcat, jam krenar që kam shërbyer me ta. Familja ime është në rrezik, por ata nuk po i japin vizat familjes time. Pra, kush do t’i marrë vizat? A do t’u jepen yjeve të filmave apo politikanët? Ata kanë mjaft para për t’u vendosur kudo në botë. Pse nuk po ndihmojnë përkthyesit që shërbyen përkrah forcave të MB?
Nuk mund të jem i lumtur që kam leje për të shkuar në Mbretërinë e Bashkuar, ndërsa jam i shqetësuar për nënën, babanë, vëllezërit, që fshihen për shkak të shërbimit tim.
Asnjëherë nuk kam kërkuar që Mbretëria e Bashkuar të ndihmojë familjen time, por tani nëse shkoj, si mund të fle natën? Sa kohë mund të fshihet familja ime?”
(Kosova Sot Online)
