Ndodh mrekullia, shpëtohet burri i ngujuar dy ditë 300 metra nën tokë

Një burrë i lënduar është shpëtua nga një shpellë në jug të Uellsit, pasi mbeti i ngujuar për më shumë se dy ditë së paku 300 metra nën sipërfaqen e tokës.

Burri u nxor nga shpella “Ogot Ffynnon Ddu” rreth orës 7 e 45 të hënën në mbrëmje pas një operacioni të vështirë që zgjati 54 orë.

Lexoni edhe:

Qeveria Kurti dhe institucionet e drejtësisë me goditjen e madhe antikrim kundër të inkriminuarit Shpend Ahmetit me kompani

Pasi u nxor në sipërfaqe, anëtarët e ekipit të shpëtimit e duartrokitën dhe e përgëzuan burrin, para se ai të transportohej me një veturë të posaçme “Land Rover” deri te një ambulancë, shkruan The Guardian.

Foto: Gareth Phillips, “The Guardian”

Personi, për të cilin thuhet se është eksplorues me përvojë i shpellave, u ngujua të shtunën rreth orës 13 pas një rrëzimi. Raportohet se lëndimet e tij nuk ia rrezikojnë jetën, por besohet se në to përfshihen një këmbë e thyer, nofulla e thyer dhe lëndimet në shpinë.

Zyrtari i shërbimeve emergjente, Gary Evans, para gazetarëve tha: “Jemi absolutisht të kënaqur. Jemi të kënaqur, sepse ishte një shpëtim i vështirë dhe jemi të kënaqur, sepse personi ia ka dalë vërtet mirë duke e marrë parasysh atë që ka ndodhur.”

Në operacionin e shpëtimit morën pjesë rreth 250 vullnetarë për shpëtim nga shpella. Rrjeti i shpellave ku u ngujua ky person është njëri prej më të gjatëve në Mbretërinë e Bashkuar.

(Kosova Sot Online)