Johnson bllokohet 20 sekonda në fjalim, qeveria reagon pas dyshimeve për shëndetin

Kryeministri i Britanisë së Madhe, Boris Johnson, ka ngecur për më shumë se 20 sekonda në të shprehur përderisa po mbante një fjalim para disa udhëheqësve të bizneseve. Pas dyshimeve për shëndetin e tij, qeveria britanike doli me një reagim.

Qeveria tha se Johnson është fizikisht mirë dhe ka zotërim të plotë të detyrës. Reagimi i qeverisë erdhi pas një fjalimi me probleme në të shprehur të kryeministrit të hënën, me ç’rast ai e ndërpreu fjalimin dhe nuk e vazhdoi për rreth 20 sekonda.

Lexoni edhe:

Filipçe tregon kur do të kthehen në Maqedoni 7 pacientët e mbijetuar nga aksidenti tragjik

Zëdhënësi i qeverisë britanike tha se personat që e dëgjuan fjalimin e kryeministrit para Konfederatës së Industrisë Britanike ishin të magjepsur me të, duke shtuar se ministrat e kabinetit kanë mundur të flasin lirisht, nëse kanë pasur ndonjë shqetësim.

Sidoqoftë, Johnson shihet duke u ndier në siklet përderisa e ndërpret fjalën dhe thotë tri herë “më falni” e i shfleton letrat që i kishte mbi foltore, shkruan The Guardian.

Duket se Johnson ishte ftohur javën e kaluar, por zëdhënësi këmbënguli se shefi i qeverisë britanike ka shëndet të mirë, duke thënë: “Kryeministri është mirë. Ai është i përqendruar për t’i shërbyer publikut.”

Zëdhënësi refuzoi ta komentonte raportin e BBC-së, sipas të cilit një burim i paidentifikuar brenda qeverisë ka thënë se brenda ndërtesës së ekzekutivit ka shumë shqetësim për kryeministrin dhe një frymë se ministrat duhet të kërkojnë ndryshime.

(Kosova Sot Online)