A mund të rrëzohet Putini nga një grusht shteti?

Ekonomia e Rusisë është gjunjëzuar, ushtria është në telashe në Ukrainë dhe morali thuhet se po bie. Një ekspert i regjimeve autoritare beson se ekzistojnë të gjitha rrethanat që zakonisht shkaktojnë një grusht shteti kundër një diktatori. Probabiliteti për ta përmbysur Putinin tani është shumë më i lartë sesa një muaj më parë, tha për Insider, Adam Casey nga Qendra Weiser për Demokracitë e Reja në Universitetin e Miçiganit.

Por meqenëse Putini ka shpenzuar dy dekada duke krijuar mekanizma për ta mbrojtur veten nga shkarkimi, shpjegoi Casey, qeveria e tij nuk duhet të pritet në asnjë moment që të rrëzohet. Sipas kërkimeve në internet, interesi për mundësinë e një grushti shteti kundër Putinit është më i larti në histori.

Të dhënat e Google Trends tregojnë se kërkimi për “grusht shteti kundër Putinit” u rrit pas pushtimit të Ukrainës, me termin e kërkimit që arriti kulmin e popullaritetit gjatë javës nga 27 shkurti deri më 4 mars. Të dhënat tregojnë se njerëzit janë ende në kërkim të këtij termi në numra të paregjistruar.

Senatori Lindsey Graham, një republikan nga Karolina e Jugut, bëri një postim në Twitter të enjten e kaluar duke inkurajuar largimin e Putinit: “E vetmja mënyrë për t’i dhënë fund kësaj është që dikush në Rusi ta largojë këtë djalë”.

Kolegët e tij nga Kongresi nga të dyja palët e kritikuan Graham, duke thënë se postimi i tij në Twitter ishte i pamatur dhe mund ta përshkallëzonte luftën.

Katastrofa ekonomike, e shkaktuar nga sanksionet gjithëpërfshirëse ndërkombëtare, do të thotë gjithashtu se klasa e mesme ruse po e ndjen vërtet krizën, theksoi Casey. Në telashe është edhe elita ruse. Pasuritë e oligarkëve, përfshirë superjahtet, janë objektiv i sanksioneve.

“Ka rrethana që kanë motivuar grusht shteti në vende të tjera”, tha Casey për Insider.

(Kosova Sot Online)