Lexoni edhe:
Armatosja e Serbisë në ndikimin e luftës në Ukrainë rrezik potencial për Bosnjën dhe Kosovën
Qeveria bën thirrje që t’i kërkoni kuponët fiskal nga bizneset
Qeveria e Kosovës mbajti sot mbledhjen e radhës. Kryeministri Albin Kurti, ndër tjera, hapi temën e kuponëve fiskalë.
“Vitin e kaluar të hyrat buxhetore u rritën për 1/3. Këtë tremujor, të hyrat përveçse janë më të larta se sa vitin e kaluar – afër 17%, edhe një herë janë më të larta se sa parashikimet e vet institucioneve. Këto janë para të qytetarëve, të cilat ne po ua kthejmë qytetarëve kur ata kanë nevojë, sepse ata kanë nevojë. Prandaj është tejet e rëndësishme, që të përsërisim thirrjen që të blejmë sa më shumë produkte vendore dhe të kërkojmë kuponët fiskalë për produktet dhe shërbimet e paguara”, bëri thirrje Kurti.
Sipas ligjit në Kosovë, kuponi duhet të lëshohet nga ofruesi i shërbimeve në çdo rast kur arkëtohen pagesa me para në dorë.
Kuponi fiskal është dëshmi e shitjes së mallrave të caktuara dhe ai përfshin edhe tatimin që duhet paguar për mallrat e shitura.
Në rast të moslëshimit të kuponit fiskal, shteti mbetet pa ato taksa.
Taksa për shumicën e mallrave në Kosovë është 18 për qind.
Nga mbi 213,000 biznese, sa janë të regjistruara në Ministrinë e Tregtisë dhe Industrisë në Kosovë, vetëm mbi 37 mijë janë të fiskalizuara, sipas ATK-së.
Bazuar në këto të dhëna, shumë biznese vazhdojnë t’u ikin obligimeve tatimore që kanë ndaj shtetit.
Arkat fiskale në Kosovë, kanë hyrë në treg në vitin 2010.
(Kosova Sot Online)
