Lexoni edhe:
Presidentja Osmani fton Metën në Kosovë për të përmbyllur mandatin
Policia “sposton pushuesit” në Ksamil, hiqen 550 çadra dhe shezlongë
Policia e Sarandës ka hequr 550 çadra dhe shezlongë në Ksamil të vendosura në hapësirën publike.
Procedohen penalisht administratori dhe pronarja e një subjekti, të cilët zunë sërish hapësirën publike, në vendin e quajtur “Pema e Thatë”, duke rivendosur shezlongë dhe çadra të tjera, pa lejen përkatëse. Procedohet penalisht edhe administratori i një subjekti tjetër, të paregjistruar në organet tatimore, i cili zuri hapësirën publike në plazh, në vendin e quajtur “Ishujt”. Në total janë sekuestruar 550 çadra dhe shezlongë.
“Në kuadër të planit operacional për kontrollin e vijës bregdetare dhe lirimin e hapësirave bregdetare të zaptuara në mënyrë të kundërligjshme, nga subjekte të ndryshme që vendosin çadra dhe shezlongë, nga specialistët për Hetimin e Krimeve në Komisariatin e Policisë Sarandë u referuan materialet në Prokurori dhe nisi procedimi penal për shtetasit:
-Gj. I., 58 vjeçe (pronare subjekti) dhe K. I., 38 vjeç (administrator subjekti), për veprën penale ““Pushtimi i tokës”; A. I., 55 vjeç (administrator subjekti), për veprat penale “Pushtimi i tokës” dhe “Fshehja e të ardhurave”. Shtetasja Gj. I. dhe shtetasi K. I. kanë zënë sërish hapësirën publike, duke rivendosur pa lejen përkatëse shezlongë dhe çadra të tjera, në vendin e quajtur “Pema e Thatë”. Shtetasi A. I. kishte zënë hapësirën publike duke vendosur pa lejen përkatëse, çadra dhe shezlogë, në vendin e quajtur “Ishujt”. Gjithashtu, ky shtetas nuk e kishte regjistruar subjektin e tij, në organet tatimore”, njofton policia.
Shërbimet e Policisë Sarandë, në bashkëpunim me Policinë Kufitare dhe Policinë Bashkiake Sarandë, kanë liruar hapësirën publike, duke hequr çadrat dhe shezlongët që ishin vendosur pa lejen përkatëse.
Materialet në ngarkim të këtyre shtetasve u referuan në Prokurorinë pranë Gjykatës së Shkallës së Parë Sarandë, për veprime të mëtejshme.
(Kosova Sot Online)
