Misioni i SHBA-së në OSBE liston kërkesat për Kosovën dhe Serbinë
Misioni i Shteteve të Bashkuara të Amerikës në OSBE ka lëshuar një komunikatë për media lidhur me situatën në Kosovë. Në komunikatë thuhet se SHBA-ja dhe Kosova janë partner të palëkundur me një histori të frotë.
“Ne jemi të përkushtuar ndaj sovraniteit dhe integritetit territorial të Kosovës. Qëllimi ynë është paqja, drejtësia dhe prosperiteti në një Kosovë demokratike dhe multietnike që është plotësisht e integruar në bashkësinë ndërkombëtare dhe pjesë e një Evrope të tërë, të lirë, reziliente dhe të lulëzuar”, thuhet në komunikatë.
Tutje në komunikatë bëhet thirrje për qeverinë e Kosovës dhe atë të Serbisë që të zbatojnë plotësisht angazhimet marra në të kaluarën, të përmbahen nga retorika që nxit tension dhe të angazhohen në mënyrë konstruktive për dialog.
“Ne vazhdojmë t’i bëjmë thirrje qeverive të Kosovës dhe Serbisë që të zbatojnë plotësisht angazhimet e tyre të kaluara, të përmbahen nga veprimet dhe retorika që rrisin tensionet dhe të vazhdojnë të angazhohen në mënyrë konstruktive dhe me mirëbesim në Dialogun e lehtësuar nga BE-ja. Kjo është e vetmja rrugë realiste për një zgjidhje afatgjatë”, thuhet tutje.
Amerikanët thonë se kjo marrëveshje duhet të jetë gjithëpërfshirëse e përqendrua në njohje reciproke.
“Prandaj është thelbësore që të dyja qeveritë të arrijnë përparim drejt një marrëveshjeje gjithëpërfshirëse, të përqendruar në njohjen reciproke. Ne kemi parë potencialin e Dialogut për të rritur stabilitetin rajonal me lidershipin dhe vullnetin e nevojshëm politik. E përshëndesim marrëveshjen e 27 gushtit të Presidentit Vuçiq dhe Kryeministrit Kurti që lehtëson udhëtimin ndërkufitar. Ne mbështesim fuqishëm udhëheqjen e Bashkimit Evropian në vazhdimin e punës së palodhur të diplomacisë brenda kornizës së Dialogut”, potencon komunikata.
Nga zyra e SHBA-së në OSBE thonë se Kosova dhe Serbia duhet të vazhdojnë negociatat serioze për të zgjidhur çështjet e pazgjidhura, përfshirë edhe targat.
“Ka më shumë punë për të bërë. Palët duhet të vazhdojnë angazhimin e tyre serioz për zgjidhjen e çështjeve të pazgjidhura, përfshirë targat”, vazhdon komunikata.
Në këtë komunikatë të misionit të SHBA-së në OSBE thuhet se iu vjen keq që Kosova s’është ende anëtare e OSBE-së për të përfaqësuar veten në këtë institucion, dhe shtojnë se presin me padurim ditën kur Kosova të bëhet pjesë
“Megjithatë, vetëm duke dëgjuar drejtpërdrejt nga të dyja palët, ne mund të kuptojmë plotësisht dinamikën në terren dhe të përcaktojmë se si t’i trajtojmë ato më së miri. Ne besojmë se është për të ardhur keq që Kosova nuk është anëtare e këtij organi dhe për këtë arsye nuk është në gjendje të flasë vetë. Ne e presim me padurim ditën kur Kosova të jetë shtet pjesëmarrës i OSBE-së dhe kjo mund të ndodhë”, përfundon komunikata.
(Kosova Sot Online)
