Flet prindi që i shkoi Haxhiut në ministri: Ai që tentoi t’ma dhunojë çikën po sillet si mbret
Ministrja Albulena Haxhiu përmes një postimi në Facebook, dje ka bërë të ditur se një prind ka raportuar në Ministrinë e Drejtësisë një rast të tentim dhunimit ndaj vajzës së tij.
Në lidhje me këtë rast media pati publikuar edhe rrëfimin e babait të vajzës.
Skajshmërisht i prekur, ai ka treguar për tentim dhunimin e vajzës brenda shkollës, ku e bija vijonte mësimet.
Atë kohë ishte arrestuar një person i dyshuar, i cili tashmë është i lirë.
Ndërkaq, tashmë ka folur sërish babai i të miturës në fjalë, që raportoi rastin.
Ai ka thënë se vajza është përballur sërish me të dyshuarin. Ai thotë se para një jave, i dyshuari i ka zënë pritën në rrugë.
Shqetësimin dhe frikën që ia ka krijuar, baba i saj e përshkruan shkurt, “Veç u dridhke çika kur erdh”.
Kjo situatë, ai thotë se ia bëri të pamundur të qëndrojë duarkryq. I vendosur për të kërkuar drejtësinë, ai ia mësyu ministrisë.
“Ju Sinjali e dini, siç keni raportu atëherë, kur ngjarja ka ndodhë në shkollë. Pas kësaj kohe unë kam shku te ministrja, ia tregova rastin, më tha që kanë me bë çmos me u zbardhë rasti. Na nuk kemi pasur asnjë informatë për të dyshuarin, a u dënu a jo a, a çka u bo. Vendosa me shku me kërku ndihmë se edhe para një jave çika kur u dalë në qytet, ai i ka dalë përpara. Erdh në shop edhe vec u dridhke çika kur erdh. M’tregoi se çka ka ndodhë… u tut çika kur e ka pa, normal. Ai sillet tash si mbret”, tha baba i vajzës.
Ky rast, ai tha se e ka tronditur jashtëzakonisht shumë familjen, prandaj s’do të lë gur pa lëvizur që të vihet drejtësia. Mungesa e informacioneve për rastin e ka detyruar t’i shkojë secilit në derë. Babai i të miturës i tha Sinjalit se pas takimit me ministren, sot ka shkuar në Prokurori e Gjykatë.
Prokurori i rastit, sipas tij i ka thënë se personi i dyshuar ka qenë i arrestuar dhe në paraburgim, por pas një muaji është liruar nga Gjykata. I frikësuar se vajzës mund t’i ndodhë diçka, e sidomos kur i dyshuari është shfaqur sërish, ai tha se ka kërkuar të paktën mbrojtje për të bijën.
“Sot kom qenë vet te Prokurori, nuk me ka thirrë. Prokurori tha që është ngritë kallëzim penal po tha kadale shkojnë këto. Ai personi ish arrestu, ka nejtë një muaj edhe e kanë lëshu, e tash sillet si mbret. Na kena kërku që së paku çika me u mbrojtë, mos me iu afru ai me një distancë të caktume, po du me rujtë çikën. Prokurori më tha se une e kom kry punën tem sa i përket Prokurorisë. Tash po pres se çka po ndodhë edhe a po i marr informacionet që i kom kërkuar. Çikën du me ru, mezi ia kemi hekë stresin e frikën. Shpresojmë që ka mu bo mirë”, ka thënë ai.
(Kosova Sot Online)
