Kurti e godet LDK-në në mbledhje të partisë dy ditë pasi Abdixhiku ia refuzoi ftesën për takim
Kryeministri Albin Kurti është kujdesur ta sulmojë sërish opozitën gjatë fjalës së tij në mbledhjen e Këshillit të Përgjithshëm të Lëvizjes Vetëvendosje.
Kurti foli për “momentet kulmore” të LVV-së gjatë viteve të fundit, duke theksuar formimin e Qeverisë Kurti 1, e cila sipas tij, nuk zgjati për shkak të interesave jo të njëjta me LDK-në, me të cilën negocioi jo pak për të bërë koalicion
“Në tetor të vitit 2019 dolëm të parët në zgjedhje, dhe në shkurt të vitit 2020 e krijuam qeverinë e parë të udhëhequr nga Lëvizja VETËVENDOSJE!, qeveria Kurti 1 siç po e quajnë ata që kanë qejf të numërojnë. Kjo qeveri nuk zgjati shumë sepse na qëlloi partneri jo i qëndrueshëm për interesa shtetërore e kombëtare”, tha Kurti.
“Por, gjatë atyre muajve që qëndruam në drejtim, e luftuam drejtpërdrejt korrupsionin, e mbrojtëm Kosovën, duke hequr nga bordet ata që s´e meritonin, duke rezistuar suksesshëm projektin për shkëmbim territorial, dhe duke vendosur gjithandej profesionistë të ndershëm e duke e afruar popullin i cili e donte Republikën më shumë se çkado tjetër”, shtoi ai.
Më pas, përmendi fitoren e “referendumit” të 14 shkurtit 2021.
“E sot e kemi qeverinë sërish nën drejtimin e Lëvizjes VETËVENDOSJE!, në aleancë me Guxo e Alternativën, që po e quajnë qeveria Kurti 2, ata që kanë qejf të numërojnë. Nuk do t´ua prishim qejfin, nuk do t´ua ndalim numërimin”, tha Kurti.
Të premten, Kurti i priti në takim krerët e partive opozitare, përfshirë kryetarin e LDK-së, Lumir Abdixhiku. Por, ish-ministri i Infrastrukturës në Qeverinë Kurti 1 e refuzoi ftesën e shefit të Qeverisë. Të njëjtën e bëri edhe kryetari i PDK-së, Memli Krasniqi. Për takim, Kurtit në Qeveri i shkoi vetëm kryetari i AAK-së, Ramush Haradinaj.
(Kosova Sot Online)
