Reagon Petkoviq pas plagosjes së dy personave në Shtërpcë
Drejtori i të ashtuquajturës Zyrë për “Kosovë dhe Metohi” në Qeverinë e Serbisë, Petar Petkoviq, ka reaguar pas plagosjes së dy të rinjve serbë në Gotovushë afër Shtërpcës, transmeton gazeta “Kosova Sot Online”.
Ai ka thënë se sipas banorëve “Milloshi dhe Stefani janë qëlluar nga një shqiptar nga vetura në lëvizje”.
“Tentim për të vrarë dy djem serbë në Gotovushë afër Shtërpcës. Fëmijët janë qëlluar nga një shqiptar, sipas banorëve, nga një veturë në lëvizje. Millosh dhe Stefan janë plagosur me armë zjarri”, ka shkruar Petkoviq.
Sipas tij, ata janë qëlluar “derisa ishin duke bartur buzmin për Krishtlindjen”.
“Dikush donte të na dhuronte një Krishtlindje të përgjakshme”, shkroi Petkoviq në llogarinë e tij në Twitter.
(Kosova Sot Online)
