Jasharaj: Test me shkrim të njohurive të mësimdhënësve nuk do t’ketë sa t’ka SBASHK

Për draft-udhëzimin që pritet të nis zbatimin nga Ministria e Arsimit, Shkencës dhe Teknologjisë, ku mësimdhënësve në Kosovë do t’ju mundësohet licencimi i avancuar përmes një testimi dhe nëse arrijnë të licencohen, do të arrijnë të përfitojnë edhe ngritje page, ka folur së fundi kreu i SBASHK-ut, Rrahman Jasharaj, 
transmeton gazeta “Kosova Sot Online”.

 Jasharaj ka thënë se nuk është kundër këtij draft-udhëzimi të MASHT-it, pasi që ka thënë se mësimdhënësve iu ofrohet mundësia t’i nënshtrohen testimit vullnetarisht.

Në anën tjetër, ai nuk ka hezituar të theksojë edhe një herë se deri sa të ekzistojë SBASHK-u, nuk do të ketë testim me shkrim për njohuritë e mësimdhënësve, gjë që kjo sindikatë e ka kundërshtuar edhe më herët.

“Sa t’ka SBASHK, test me shkrim të njohurive të mësimdhënësve nuk do t’ketë”, ka thënë shkurt Jasharaj.

Ai ka thënë se nëse mësimdhënësit dëshirojnë të ngrisin pagat e tyre, e kanë mundësinë që vullnetarisht t’i nënshtrohen testimit, por ai nuk është obligativ. 

(Kosova Sot Online)