Afera McGonigal/ Washington Times: Departamenti i Drejtësisë pranon se fshehu provat ‘pa dashje’
Mediat amerikane i rikthehen aferës së Charles McGonigal, ish-agjentit të lartë të FBI-së.
Gazeta ‘Washington Times’ raporton sot se Departamenti i Drejtësisë në SHBA ka pranuar se ka fshehur provat për këtë çështje, por thotë se e ka bërë këtë ‘pa dashje’.
“Departamenti i Drejtësisë pranoi të enjten se ua fshehu ‘pa dashje’ provat avokatëve mbrojtës që përfaqësojnë një ish-zyrtar të lartë të FBI-së, i cili ishte i përfshirë në hetimin e marrëveshjes së fshehtë Trump-Rusi dhe tani akuzohet për komplot me Rusinë për të shkelur sanksionet e SHBA.
Në një letër drejtuar gjykatëses së qarkut të Manhattan-it, Jennifer Reardern, prokurori i Departamentit të Drejtësisë, Damian Williams tha se ekipi tij gabimisht harroi t’i dorëzonte katër kategori provash ekipit mbrojtës të ish-zyrtarit të FBI, Charles McGonigal gjatë procesit të zbulimit.
“Në shqyrtimin e dosjeve tona, qeveria identifikoi disa gjëra që ishin harruar pa dashje,” shkruan Williams. “Qeveria pret të bëjë një dosje shtesë zbulimi që përmban këto materiale deri në fund të javës”.
Sipas letrës së zotit Williams, prokurorët hoqën dorë nga fletëthirrjet shtesë, dokumentet shtesë nga dosjet hetimore të FBI-së, materialet e gjetura në pajisjet elektronike të sekuestruara që nuk ishin përfshirë në dosjet e përgatitura më parë dhe të dhënat në lidhje me regjistrin e pajisjes elektronike që regjistron të gjithë numrat nga një linjë e caktuar telefonike”, thuhet në shkrim.
Letra vjen më shumë se tre muaj pas arrestimit të Charles McGonigal, i cili shërbente si agjent special në divizionin e kundërzbulimit të FBI-së në Nju Jork.
Prokurorët thonë se McGonigal pranoi pagesa sekrete nga miliarderi rus, Oleg Deripaska në këmbim të hetimit të një oligarku rival, sipas dokumenteve të gjykatës. Ai akuzohet gjithashtu për falsifikimin e firmave për t’i mbajtur këto pagesa sekrete.
Gazeta thekson se McGonigal, 54 vjeç, është zyrtari më i lartë i FBI-së i akuzuar ndonjëherë për një krim.
‘Washington Times’ shkruan po ashtu se McGonigal përballet me të tjera akuza në lidhje me një dosje tjetër, e njohur si dosja shqiptare.
“Ai gjithashtu po përballet me akuza të veçanta penale në Uashington, ku akuzohet për falsifikimin e dokumenteve për të fshehur pagesat sekrete në para të thata nga një person që dikur shërbente me inteligjencën shqiptare. Me kërkesë të zyrtarit, McGonigal hapi një hetim të FBI-së për lobimin e huaj në të cilin ish-punonjësi i inteligjencës shqiptare ishte një informator konfidencial,” thekson gazeta.
(Kosova Sot Online)
