Lexoni edhe:
Rrëzohet një aeroplan në Shtoj të Ulqinit, lëndohen piloti dhe një person tjetër por pa viktima
Përvjetori i masakrës së Rahovecit, Osmani: Regjimi gjenocidal i Serbisë vrau mizorisht afro 150 gra, fëmijë e pleq në teqe
Presidentja e vendit, Vjosa Osmani ka përkujtuar sot masakrën e Rahovec, ku 25 vjet më parë, më 19 korrik të vitit 1998 nga forcat serbe u vranë afro 150 persona, transmeton "Kosova Sot Online".
Presidentja theksoi se përkujtimi i sotëm është vetëm një mundësi për ta kujtuar këtë ditë të trishtë, për ta kujtuar të kaluarën dhe për t`i nderuar viktimat, por mbi të gjitha është thirrje për drejtësi.
“Më 19 korrik të vitit 1998, forcat e regjimit gjenocidal të Serbisë vranë mizorisht afro 150 gra, fëmijë e pleq, të strehuar në Teqen e Sheh Myhedinit në Rahovec, sikurse edhe në vendin e quajtur ‘Tuma’.
Përkujtimi i sotëm nuk është vetëm një mundësi për ta kujtuar këtë ditë të trishtë, për ta kujtuar të kaluarën dhe për t`i nderuar viktimat, por mbi të gjitha është thirrje për drejtësi.
Kujtimi për jetët e humbura e të pafajshme do të jetë i përhershëm, teksa zëri ynë për drejtësi do të kumbojë, deri në triumfin e saj!”, shkruan e para e shtetit.
Ndryshe, më 19 korrik të vitit 1998, si pasojë e një sulmi të forcave serbe, në Rahovec shumë shqiptarë u vranë e u plagosën.
Në Teqen e Sheh Myhedinit në Rahovec u masakruan shumë gra, fëmijë dhe pleq që kishin kërkuar strehim në këtë institucion fetar.
Te vendi i quajtur “Tuba” u gjetën të masakruar dy profesorë, si dhe gjashtë trupa të karbonizuar, ndërsa gjithsej u regjistruan 150 persona të vrarë.
Dëshmitarët që kishin arritur t’i shpëtojnë këtij krimi, tregojnë se ushtria, policia dhe paramilitarët serbë kanë ekzekutuar civilë shqiptarë arbitrarisht.
Gjatë kësaj ofensive u morën peng, u zhdukën dhe u morën peng shumë shqiptarë.
Në atë periudhë organet e pushtetit serb në Prizren, më 22 korrik, në varrezat e këtij qyteti hapën dy gropa të mëdha dhe varrosën shqiptarët e vrarë gjatë ofensivës në Rahovec.
(Kosova Sot Online )
