Trupi i Liridonës do të rivarroset sot në fshatin e lindjes Rracaj në Gjakovë

Rivarrimi i trupit të Liridona Ademaj do të bëhet sot në varrezat e fshatit Rracaj Gjakovë, përcjell “Kosova Sot Online”.

“Njoftim mortor nga familja Ademaj. Familja Ademaj njofton miq, shokë e dashamir se rivarrimi i vajzës tonë Liridona Ademaj e vrarë me datën 29.11.2023 bëhet me datë 4 dhjetor 2023 në varrezat e fshatit Rracaj në ora 14:00”, thuhet në njoftimin e faqen e fshatit Rracaj.

Familjarët e të ndjerës të dielën i kishin dorëzuar kërkesë me shkrim prokurores Besa Limani për të lejuar zhvarrosjen dhe rivarrimin e Liridonës.

“E nderuar prokurore, kërkojmë nga ju që të na mundësoni që turpin e vajzës sonë Liridona Ademaj ta zhvarrosim dhe ta rivarrosim në fshatin Rracaj. Kjo është një procedurë dhe përjetim tepër i rëndë për neve dhe këtë vendim e kemi marrë me shumë vështirësi por duam që ajo të prehet në shtëpinë e saj”, thuhej në kërkesën e familjarëve të Liridonës.

Ndryshe, Liridona Ademaj, është vrarë më 29 nëntor në Prishtinë, ku në mesin e tre të dyshuarve për vrasjen e 30-vjeçares është edhe burri i saj, Naim Murseli.

(Kosova Sot Online)