Kurti viziton familjen e presidentit të parë të Kosovës, Ibrahim Rugovës

Familjen e presidentit të parë të Kosovës, Ibrahim Rugova, në përvjetorin e 18 të vdekjes së tij, e ka vizituar kryeministri Albin Kurti, transmeton gazeta “Kosova Sot Online”.

Kurti ka shpërndarë fotografi nga kjo vizitë, duke shkruar në Facebook se Rugova “e bashkoi popullin e Kosovës kundër okupimit të Serbisë”.

“Sot, 18 vite më parë u nda nga jeta Presidenti Historik i Kosovës, doktor Ibrahim Rugova. Ai e bashkoi popullin e Kosovës kundër okupimit të Serbisë, duke e bërë rezistencën humane dhe humanitetin rezistencë. Në nderim të figurës së tij dhe kontributit të madh për kombin dhe shtetin tonë, bashkë me zëvendëskryeministren Gërvalla dhe ministrin Çeku vizituam familjen Rugova: bashkëshorten Fanë, vajzën Teuta, djemtë Mendimin dhe Ukën me bashkëshortet e tyre Blerinën dhe Blertën”, shkroi Kurti.

Në rezidencën ku Rugova e zhvillonte aktivitetin e tij, Kurti tregoi se ai dhe dy zëvendësja e tij, Donika Gërvalla dhe ministri i Kulturës, Hajrulla Çekun i njoftuan familjarët se “së shpejti do të nisin punimet për restaurimin”.

“Na pritën në Rezidencën e Presidentit Rugova, aty ku ai kishte pritur personalitete të mëdha botërore dhe ku janë marr vendime të rëndësishme e përcaktuese për fatin e shqiptarëve dhe të Kosovës. Në këtë shtëpi Dr. Rugova zhvilloi aktivitetin e tij nga viti 1993 e deri në ditën e fundit të jetës. Për shkak të vlerave që posedon, kjo ndërtesë është shpallur aset i mbrojtur i trashëgimisë kulturore më 2016”, shkroi Kurti.

“Familjen Rugova e njoftuam se së shpejti do të nisin punimet për restaurimin e Rezidencës së Presidentit Ibrahim Rugova. Ky projekt dhe investim i qeverisë sonë është dëshmi e përkushtimit tonë për të nderuar personalitetet e larta dhe ngjarjet historike të rrugëtimit tonë shtet-formues, nga ilegalja, lëvizjet studentore, rezistenca paqësore, lufta çlirimtare e deri te shteti i pavarur e sovran që e gëzojmë sot”, shtoi ai.

Paraprakisht, Kurti së bashku me presidenten Vjosa Osmani bënë homazhe te varri i Ibrahim Rugovës.

(Kosova Sot Online)