Lexoni edhe:
“Serbia ndoshta largohet nëse Kosova hyn në KiE”, Von Cramon: Një mashtrim natyrisht
Bushati i reagon Aleksandër Vuçiqit: Paralajmërimi për largim nga KiE nëse pranohet Kosova, është në kundërshtim me marrëveshjet e BE’së
Ish-Kryediplomati i Shqipërisë, Ditmir Bushati, ka reaguar pasi Presidenti i Serbisë, Aleksandër Vuçiq, deklaroi se Serbia mund të largohet nga Këshilli i Evropës nëse anëtarësohet Kosova në këtë organizatë, transmeton "Kosova Sot Online ".
Bushati ka thënë se kjo retorikë është në kundërshtim me marrëveshjet e Bashkimit Evropian, sipas të cilave Serbia nuk do të kundërshtojë anëtarësimin e Kosovës në asnjë organizatë ndërkombëtare.
“Kjo retorikë shkon në kundërshtim me marrëveshjet e Bashkimit Evropian, sipas të cilave Serbia nuk do të kundërshtojë anëtarësimin e Kosovës në asnjë organizatë ndërkombëtare. Duke tërhequr paralele me Rusinë dhe duke kërcënuar me largim nga Këshilli i Evropës që kontribuon në mbrojtjen e të drejtave të njeriut nuk është e dobishme as për Serbinë dhe as për minoritetin serb në Kosovë”, ka shkruar Bushati.
Ndryshe, Presidenti i Serbisë, Aleksandar Vuçiq, në një intervistë për mediat serbe mbrëmë ka thënë se Serbia mund të largohet nga Këshilli i Evropës nëse pranohet Kosova.
“Një mundësi është largimi nga Këshilli i Evropës. Hyrja e Kosovës në atë organizatë do të ishte de facto dëbim i Serbisë” ka thënë Vuçiq.
“Do të jetë shumë, shumë e pakëndshme kur (ndërkombëtarët), të dëgjojnë të gjitha detajet se si e kanë gënjyer Serbinë për Këshillin e Evropës dhe të gjitha historitë e tjera. Bëjeni këtë, dhe pastaj do të shohim nëse Serbia dëshiron të qëndrojë apo jo në Këshill të Evropës. Pra, të shohim, ndoshta ju pëlqen ta keni Prishtinën në Këshillin e Evropës më shumë se sa Beogradin dhe Serbinë”, tha Vuçiq. Ai tha se nuk do ta zbulojë deri në fund se cili do të jetë veprimi i tyre.
Presidenti i Serbisë minimizoi rolin e KiE duke thënë se është një organizatë që nuk vendos për asgjë.
Po ashtu duke rikujtuar se Rusia u përjashtua nga Këshilli i Evropës, para se aplikimi i Kosovës të futet në rend dite, ai përsëriti se anëtarësimi i Kosovës do të thotë de facto dëbim i Serbisë nga ajo organizatë.
(Kosova Sot Online )
