Ky shtet i nis 97 ushtarë në Kosovë
Një kontingjent prej 97 ushtarakësh u përcoll të enjten me një ceremoni zyrtare para Bashkisë së Shumenit të Bullgarisë, për të marrë pjesë në misionin ndërkombëtar të NATO-s në Kosovë, transmeton gazeta “Kosova Sot Online”.
Në ceremoni morën pjesë Zëvendësshefi i Mbrojtjes, Gjeneral Leitnant Mihail Popov, Admirali i Flotës Galin Manev, Zëvendëskomandanti i Komandës së Forcave të Përbashkëta, Gjeneral Brigade Plamen Jordanov, Zëvendëskomandanti i Forcave Tokësore, Prefektja e Qarkut të Shumenit Katya Ivanova, Kryetarja e Këshillit Bashkiak Asya Asparuhova dhe Nënkryetari i Bashkisë Shumen, Nikolay Kolev, raporton BTA
“Gjithësecili prej jush e di se misionet nuk janë njësoj. Çdo javë dhe çdo ditë sjell diçka të re. Situata në Kosovë për momentin është e qëndrueshme, por mund të ndryshojë në çdo çast. Prandaj, duhet të jeni të gatshëm të reagoni në mënyrë adekuate. Ndiqni procedurat standarde dhe urdhrat e komandantëve tuaj”, theksoi Popov gjatë fjalës së tij drejtuar kontingjentit.
Ai shtoi gjithashtu: “Jam i bindur se përvoja dhe përgatitja juaj do t’ju lejojë të kryeni detyrat në nivel të lartë. Mbani gjithmonë në mendje një gjë – në Kosovë, ju nuk përfaqësoni vetëm Batalionin e 29-të të Mekanizuar apo Forcat Tokësore. Para aleatëve tanë përfaqësoni Ushtrinë Bullgare, ndërsa para popullsisë dhe autoriteteve lokale, jeni përfaqësues të NATO-s”.
Nënkryetari i Bashkisë Shumen, Nikolay Kolev, i dhuroi kontingjentit një ikonë të Shën Gjergjit Fitimtar dhe u drejtua me këto fjalë: “Kur një ushtar bullgar kalon kufijtë e Bullgarisë, kjo gjithmonë lidhet me një mision të rëndësishëm dhe detyrë ndaj atdheut. Sot po përcjellim ju, ushtarakët e kompanisë manovruese të Batalionit të 29-të të Mekanizuar, dhe të gjithë besojmë në përgatitjen tuaj të mirë, profesionalizmin dhe disiplinën tuaj”.
(Kosova Sot Online)
