I dyshuari për vrasjen e Enver Bajraktarit e ka pranuar kryerjen e veprës penale

Prokuroria Themelore në Prishtinë në bashkëpunim të ngushtë me Policinë e Kosovës kanë ndërmarrë një aksion hetimor të suksesshëm lidhur me rastin e vrasjes së rëndë ku viktimë ishte Enver Bajraktari nga Lipjani, transmeton gazeta “Kosova Sot Online”.

Sipas njoftimit zyrtar, më 12 gusht 2025, në kuadër të hetimeve të vazhdueshme dhe veprimeve të pandërprera që nga momenti i raportimit të rastit, është realizuar një urdhër kontroll në fshatin Baicë të Komunës së Lipjanit. Si rezultat i këtij kontrolli është arrestuar një person i dyshuar, mashkull me inicialet T.K.

“I dyshuari, pas ndalimit dhe dhënies së deklaratës në polici, ka pranuar kryerjen e veprës penale. Ai është ndaluar me vendim të prokurorit të shtetit dhe ndaj tij po vazhdojnë procedurat e mëtejme ligjore”, thuhet në komunikatën e përbashkët nga Prokuroria Themelore në Prishtinë dhe Policia e Kosovës.

(Kosova Sot Online)