Sveçla: Është e qartë se në Prishtinë askush nuk është fitues

Gjatë ditës së djeshme u mbajt raundi i dytë i zgjedhjeve lokale në Kosovë, transmeton gazeta "Kosova Sot Online".

Plot 18 komuna ishin pjesë e procesit për zgjedhjen e kryetarëve.

E pritshmëritë për rezultatet ishin më të mëdha siç duket për Lëvizjen Vetëvendosje, sidomos në komunat kyçe.

Ministri i Punëve të Brendshme në detyrë, Xhelal Sveçla , ka thënë se VV doli shumë më mirë se gjitha herat në zgjedhje lokale.

Por jo siç e prisnin.

“Dje u zhvillua dhe u përmbyll me sukses procesi i raundit të dytë zgjedhor ku qytetarët patën mundësinë të zgjedhin udhëheqjen e komunave të tyre. Lëvizja VETËVENDOSJE! doli shumë më mirë se gjitha herat në zgjedhje lokale. Patjetër që pritshmëritë tona, me të drejtë ishin më të mëdha. Nëpër disa komuna na duhet punë më e madhe, e në disa më shumë qartësim të konceptit kundrejt votuesit”, shkroi ai në një postim në Facebook para pak minutash.

Sipas tij, në Prishtinë humbësi më i madh është qytetari.

“Është e qartë se në Prishtinë askush nuk është fituesi ndërsa humbësi më i madh është qytetari i saj. Lëvizja VETËVENDOSJE! humbi jo nga shpalosja apo bashkimi i ideve por nga koalicioni i pazareve të llojeve e niveleve të ndryshme. Koalicioni LDK-PDK-AAK, oligarkë e disa kuazimedia do ti kushtojë më së shumti qytetarit”, tha ai tutje.

(Kosova Sot Online)