Disa mjekë arrestohen pasi 9 foshnje vdiqën në maternitet

Dy mjekë të lartë janë arrestuar në Rusi pas vdekjes së nëntë foshnjave në një maternitet në Siberi këtë muaj.

Të porsalindurit vdiqën gjatë pushimeve të gjata të Vitit të Ri në Novokuznetsk, tha autoriteti kryesor hetimor i Rusisë në një deklaratë.

Nuk është dhënë asnjë arsye për vdekjen e foshnjave.

Rasti ka shkaktuar zemërim në të gjithë Rusinë, ka raportuar BBC, transmeton Gazeta Express.

Të gjitha foshnjat kanë lindur në Spitalin e Maternitetit Nr. 1 të Novokuznetsk nga 1 deri më 12 janar, me vdekjen e parë më 4 janar, tha zëdhënësja e Komitetit Hetimor të Rusisë Svetlana Petrenko.

Pa dhënë detaje, komiteti tha se mjeku kryesor dhe kreu i njësisë së kujdesit intensiv ishin ndaluar për “kryerje të papërshtatshme të detyrave të tyre zyrtare dhe profesionale në organizimin dhe ofrimin e kujdesit mjekësor”.

Ai tha se të dyshuarit po bashkëpunonin me hetimin dhe autoritetet po vendosnin për akuzat, si dhe paraburgimin.

Komiteti publikoi një video që tregon një burrë duke u shoqëruar dhe një burrë duke nënshkruar disa dokumente në prani të një oficeri të uniformuar.

Viktimat dhe dëshmitarët janë marrë në pyetje dhe materialet janë sekuestruar, ndërsa puna për të mbledhur më shumë prova vazhdon, shtoi ajo.

Po kryheshin nëntë ekzaminime pas vdekjes.

Agjencia e lajmeve Interfax tha se Ministria e Shëndetësisë e Rajonit të Kemerovës, e cila po hetonte gjithashtu, tha se foshnjat kishin pasur një infeksion të rëndë intrauterin.

Spitali ka njoftuar se nuk pranon më pacientë për shkak të një shkalle më të lartë se zakonisht të infeksioneve të frymëmarrjes.

(Kosova Sot Online)