Liverpool duhet transferojë Upamecanon, pas lëndimit të Van Dijk

Qendërmbrojtësi i Liverpool, Virgil van Dijk, do të mungojë për disa muaj pas lëndimit në ndeshjen kundër Everton, duke lënë një boshllëk të madh në mbrojtjen e të kuqve.

Legjenda e Liverpoolit, Jamie Carragher, ka propozuar që të kuqtë të tentojnë për mbrojtësin e RB Leipzig, Dayot Upamecanon, pasi që Van Dijk do t’i nënshtrohet operacionit pas lëndimit në ndeshjen kundër Evertonit.

Carragher beson se kampioni në fuqi duhet ta transferojë Upamecanon, në mungesë të qendërmbrojtësve.

Për qendërmbrojtësin francez interesim ka shprehur edhe skuadra e Manchester Unitedit.

“Dejan Lovren u largua dhe nuk e zëvendësuan, tani kanë vetëm tre qendërmbrojtës dhe njëri prej tyre, Joel Matip është gjithmonë i lënduar. Por është në pikëpyetje tani edhe Joe Gomez”, u deklarua Carragher.

Upamecano ka kontratë me klubin gjerman Leipzig deri në vitin 2023, ndërsa klauzola e tij është 50 milionë euro.

(Kosova Sot Online)