Konfirmohet rikthimi i Osimhen
Luciano Spalletti ka konfirmuar se Victor Osimhen do t’i bashkohet Napolit për ndeshjen e nesërme kundër Hellas Veronas, në kuadër të javës së 30-të në Serie A.
Ky lajm padyshim se është i mirë për Napolin, që javën e ardhshme do të zhvillojnë ndeshjen e kthimit kundër Milanit, në çerekfinale të Ligës së Kampionëve
“Gjendja e tij është e mirë. Kam pasur një takim me mjekët dhe nesër do të thirret kundër Veronas. Natyrisht, objektivi është të arrijmë në maksimumin tonë për ndeshjen e së martës, por nesër ai do të jetë me ne në pankinë”, tha Spalletti në konferencën e sotme për media.
Spalletti gjithashtu paralajmëroi se do të ketë disa ndryshime në skuadër për ndeshjen e nesërme, duke marrë parasysh se skuadra e tij thuajse e ka të sigurt titulllin e kampionit në Serie A dhe po fokusohet në Ligën e Kampionëve.
Napoli pësoi humbje 1:0 ndaj Milanit në ndeshjen e parë çerekfinale të zhvilluar në “San Siro”, teksa mungesa e Osimhenit padyshim se ishte hendikep i madh për napolitanët.
Tani, liderët e Serie A do të synojnë të përmbysin rezultatin e ndeshjes së parë për të siguruar kalimin në gjysmëfinale të Ligës së Kampionëve.
Ndeshja e kthimit do të zhvillohet më më 18 prill, në stadiumin “Diego Armando Maradona”.
(Kosova Sot Online)