Manchester City ia lë në dorë trajnerit Pep Guardiola vendimin

Manchester City pritet t’ia lërë në dorë trajnerit Pep Guardiola vendimin për të ardhmen e tij në klub, në një moment kur spekulimet për largimin e mundshëm të teknikut spanjoll vazhdojnë të jenë të pranishme.

Sipas raportimeve që qarkullojnë që nga muaji janar, drejtuesit e kampionëve të Anglisë nuk do të ushtrojnë presion mbi Guardiolën, duke i dhënë atij kohën dhe hapësirën e nevojshme për të vendosur nëse do të vazhdojë apo jo në “Etihad”.

Në prapaskenë, emri që po fiton më së shumti terren si pasues i mundshëm është ai i Enzo Maresca. Italiani konsiderohet kandidati favorit për të marrë drejtimin e skuadrës në rast se Guardiola vendos të largohet.

Edhe pse në media janë përmendur edhe alternativa të tjera, përfshirë Vincent Kompany, burime pranë klubit bëjnë të ditur se drejtuesit e Manchester City-t kanë një vlerësim të lartë për Marescan dhe e shohin atë si profilin ideal për të vazhduar projektin aktual.

Për momentin, gjithçka mbetet në pritje të vendimit të Guardiolës, i cili do të jetë përcaktues për të ardhmen e pankinës së “Qytetarëve”.

(Kosova Sot Online)