Lexoni edhe:
Qumështarët sot portestojnë para qeverisë
Shkon në mbi 1 milion numri i viktimave të pandemisë në botë, s’ka shenja ngadalësimi
Sipas të dhënave të Universitetit “Johns Hopkins”, numri i përgjithshëm i personave që kanë vdekur nga sëmundja Covid-19 në mbarë botën ka shkuar në mbi 1 milion dhe nuk ka shenja që shifrat e viktimave dhe personave të infektuar po ngadalësohen.
Shifra e frikshme u arrit të martën në mëngjes sipas kohës së Evropës Qendrore, nëntë muaj që nga koha kur autoritetet në Kinë njoftuan për përhapjen e rasteve të pneumonisë me shkaktar të panjohur në qytetin Wuhan. Rasti i parë fatal ishte regjistruar 12 ditë më vonë.
Sipas rifreskimit më të ri të të dhënave, deri më tani janë konfirmuar 1,000,555 vdekje nga Covid-19. Këto të dhëna sigurohen, mes tjerash, edhe nga informatat e Organizatës Botërore të Shëndetësisë dhe Qendrave për Kontrollimin dhe Parandalimin e Sëmundjeve në Evropë dhe në Shtetet e Bashkuara.
Megjithatë, një zyrtar i lartë i Organizatës Botërore të Shëndetësisë tha të hënën se shifra zyrtare mund të jetë më e ulët se numri i vërtetë i viktimave, shkruan The Guardian.
“Kur llogarisni gjithçka, nuk mund ta llogarisni në mënyrë të përsosur, por mund t’ju siguroj që numrat e tanishëm ka gjasë të jenë nënvlerësim i shifrës së vërtetë të Covid-it”, tha Mike Ryan, ekspert i emergjencave në OBSh.
Vendet më të prekura nga pandemia deri më tani janë Shtetet e Bashkuara, India, Brazili dhe Rusia.
(Kosova Sot Online)
