Prishtina në terr, mungon ndriçimi publik nëpër lagje

  • A.P /
  • 30 shtator 2020 - 19:52
Prishtina në terr, mungon ndriçimi publik nëpër lagje

Që Prishtina është qytet në zgjerim e sipër e tregojnë edhe mbrëmjet në të.

Përveç numrit të madh të poçeve elektrike, që mund të duken nga larg, në disa pjesë kalimi është i vështirë, pikërisht në mungesë të ndriçimit publik.

Në errësirë totale banorëve e qytetarëve të ndryshëm, që kalojnë nëpër lagjen ‘’Dardania’’, u duhet të gjejnë veten përballë situatave të ndryshme.

Sipas tyre, në shumë situata ata rrezikohen nga qentë endacakë .

Qytetarët kritikojnë Komunën për mungesën e ndriçimit nëpër shumë pjesë të “Dardanisë”, ku sipas tyre disa shtylla janë funksionale e shumë të tjera jo.

Rrezikun thonë se e presin edhe nga makinat, që pavarësisht territ shoferët në raste tejkalojnë shpejtësinë e lejuar, raporton ktv.

Zyrtari komunal që merret më projektet e zgjerimit të rrjetit publik elektrik, Bashkim Sadiku thotë se kontrata për mirëmbajtjen e ndriçimit është ende në proces të vlerësimit.

Por, nuk është vetëm lagjja “Dardania” ajo që ka mbetur pa ndriçim publik.

Sadiku thotë se pas përfundimit të procedurave për nënshkrimin e kontratës për zgjerimin e ndriçimit publik do të intervenohet edhe në Lagjen e Spitalit.

Sadiku tha se prishjet shkaktohen edhe nga banorët, por edhe nga intervenimet e shumta nga kompani të tjera nëpër shtylla.

(Kosova Sot Online)